Andrey Fyodorov: "Hakam o'zgarganini kiyinish xonasida bildim"

Bosh murabbiy Andrey Fyodorovga "temiryo'lchilar" himoyachisi Igor Yelich hamrohlik qildi. 

A.Fyodorov: Avvalo, hozir men uchun o'yin haqida gapirish qiyin. CHunki, o'yin ikki qismdan iborat bo'ldi: chetlatishgacha bo'lgan vaqt va undan keyingisi. Agar hisobni inobatga olmasak, men futbolchilarimizning bugun ko'rsatgan o'yini va uchrashuvga munosabatidan xursand bo'ldim. Buning uchun ularga rahmat aytaman. Ha, hisob juda ham yirik ko'rinish oldi. Maydonda bir kishi kam qolgan bo'lsakda, himoyaga yotib olganimiz yo'q. Omadimizni hujumdan izladik. Mezbonlar esa qarshi hujumdan unumli foydalanib, bizni jazolashdi. 

I.Yelich: Bugun shunchaki bizning kunimiz emasdi. Hammasi bizning zararimizga ishladi. Nachora, bu o'yinni tezroq esdan chiqarish kerak, uchrashuv tarixga aylandi. Endi bor etiborni Superliga o'yinlariga qaratamiz. 

- Jamoa bu o'yinga qanday tayyorgarlik ko'rgan edi?

A.Fyodorov: Biz har bir uchrashuvga jiddiy yondashuv bilan tayyorgarlik ko'ramiz. Bu safar ham shunday bo'ldi. Siz bizni o'yinga masuliyatsizlik bilan tayyorgarlik ko'rgansizlar, uchrashuvni berdinglar, demoqchi bo'lyapsizmi? Xato o'ylayapsiz. Kubok o'yinlarida har qanday holatni kutish mumkin. Boz ustiga u bitta o'yindan iborat bo'lsa. 

- Qizil kartochka ko'rsatilgan vaziyatni qanday izohlaysiz?

A.Fyodorov: - Bu emociyalar bilan bog'liq vaziyat. Futbolchilar bunday muhim o'yinlarda asablarini jilovlay olmasliklari odatiy hol. Bundan avval ham bo'lgan, bundan keyin takrorlanmasligiga hech kim kafolat bera olmaydi. Lekin biz har bir uchrashuv oldidan futbolchilarga bu haqda gapiramiz. 

- Hakam almashgani haqida qachon xabar topdingiz?

A.Fyodorov: - Kiyinish xonasida. O'yin qaydnomasini to'ldirayotganimda bu haqda xabar berishdi.