"Andijon" sport direktori: "Jasur Jaloliddinov "Lokomotiv"ga o'tgani yo'q"

Biz bunga aniqlik kiritish maqsadida "Andijon" klubi sport direktori Boburjon Alimardonovga murojaat qildik. 

"Jasur Jaloliddinov hozircha "Andijon" futbolchisi. Uning klubimiz bilan yil oxirigacha mo'ljallangan shartnomasi bor. "Lokomotiv" bilan bu borada muzokara o'tkazganimiz yo'q. Menimcha, matbuot xizmati biroz shoshildi", - deb gap boshladi "Andijon" sport direktori.

- Jaloliddinov baribir "Lokomotiv"ga o'tsa, "Andijon" uning uchun tovon puli oladimi? 

- Albatta, chunki uning amaldagi shartnomasi bor. Yil boshida Jasur klubimizga kelganida yozda faqatgina xorij klubidan taklif bo'lsa, uni erkin agent sifatida qo'yib yuborishga kelishilgan va shartnomasida shu band bor. Lekin O'zbekistonning istalgan boshqa klubiga o'tsa, tovon puli olishimiz kerak.