"Andijon-SGS" "Istiqlol" stadioni bilan kelishuvga erishdi

O'z oldiga professional futbol klub sifatida har tomonlama shakllanib borishni, turli yosh toifasidagi terma jamoalarimizga munosib nomzodlarni etkazib berishni, mahalliy iqtidorlarni xorij klublarida faoliyat yuritishini taminlashni asosiy maqsad qilib qo'ygan "Andijon-SGS" bu yil O'zbekiston Professional Futbol Ligasining licenziyalash jarayonidan o'tadi.

Bu borada jamoa ayni damda O'zPFLning licenziyalash bo'limi bilan yaqin hamkorlik o'rnatgan xolda so'ralgan hujjatlarni rasmiylashtirish ishlarini olib bormoqda. 

Licenziyalashga ko'ra, I-01-5, I-02.3, I-03.2, I-03.5, I-03.6, I-06.1 bandlaridagi talablar ijrosini taminlash belgilangan. Yani jamoa uy o'yinlarini o'tkazish uchun talabga javob beradigan stadionni tanlash va uning hujjatlarini taqdim etish lozim bo'ladi. 

Yuqoridagilardan kelib chiqqan xolda, jamoa bu yil o'z uy uchrashuvlarini Andijon shahridagi "Bobur Arena" stadionida o'tkazish bo'yicha O'zPFLga malumot taqdim etgan. 

Xabaringiz bor, bugungi kunda "Bobur Arena" stadionida keng tamirlash ishlari olib borilmoqda. Viloyat hokimining amaliy yordami bilan maydon sifatini yaxshilash maqsadida, drenaj sug'orish tizimi qaytadan qilinmoqda. Tabiiyki, maydon chimi yangilanadigan bo'ldi. SHuningdek, yoritish tizimini ham talab darajasiga keltirish ko'zda tutilgan.  

Ammo yurtimizga kutilmaganda anomal sovuq havoning kirib kelishi "Bobur Arena"dagi tamirlash ishlariga ham salbiy tasirini o'tkazmasdan qolmadi. Maydon mutaxassislarining bizga malum qilishicha, stadion katta ehtimol bilan may oyida to'liq foydalanishga topshiriladi. 

SHuni inobatga olib, "Andijon-SGS" chempionatning birinchi davra uy uchrashuvlarini vaqtincha Farg'ona shahridagi "Istiqlol" stadionida o'tkazish uchun kelishuvga erishdi. 

Klub sport direktori Islombek Rustamov kuni-kecha Farg'ona shahrida bo'lib, "Istiqlol" stadionining bugungi xolati bilan yaqindan tanishdi. Stadion boshqaruv raisi Ilhomjon Sabitov bilan uchrashuv chog'ida tashkiliy masalalar yuzasidan to'liq kelishib olindi va yakunda O'zPFL talabidan kelib chiqib, uch tomonlama shartnoma imzolandi. Ushbu rasmiy kelishuv yakuni bo'yicha jamoa O'zPFLni xabardor etdi.