Alibobo Rahmatullaev: “G'alaba qozonishimiz shart edi”

Zaxiradan maydonga tushgan Rahmatullaev mezbonlar darvozasiga ikkinchi golni urishga erishdi. Aynan shu gol yakunda muhim ahamiyatga egaligi bilan yodda qoldi:

- Barchaga malumki, kubok uchrashuvlarida har qanday jamoa ham munosib tarzda tayyorgarlik ko'rib ijobiy natijani qayd etish uchun harakat qiladi. “Cementchi” jamoasi ham kubokdagi ajoyib o'yinlari bilan muxlislarni xursand qilishga intilib keladi. Misol uchun quvasoyliklar o'tgan yili “Olmaliq” va “Mashal” klublarini mag'lub etib chorak final yo'l olib, “Paxtakor” bilan o'z maydonida durang o'ynagandi. Aynan shu nuqtai nazardan olib qaraganda “Cementchi” bilan o'tadigan o'yinni qiyin bo'lishini bilardik. Maydon egalari maydonda yaxshi o'yin namoyish etishdi.

Jamoamiz chempionatning dastlabki ikki turida g'alaba qozonmaganligi sababli, Quvasoydan ijobiy natija bilan qaytishimiz shart edi. SHu sababli, bahsga munosib tarzda hozirlik ko'rgandik. Maydonda bor kuchimiz bilan to'p surib, yakunda yutuqni qo'lga kiritdik. Bu orqali klub rahbariyati va muxlislarimiz oldida yuzimiz yorug' bo'ldi, - deydi Rahmatullaev.