Aleksandr Xomyakov: "Qo'lga kiritilgan har bir ochko qadrli, natijadan qoniqdim"

O'yin haqida

- Birinchi navbatda Andijonga katta futbol qaytgani bilan barchani tabriklayman. Bugun muxlislar bayramona muhit tashkil etib berishdi. Stadiondagi atmosfera ham ajoyib tarzda edi. 

O'yinga kelsak, biz mana shunaqa bayramona oqshomda muxlislarga g'alaba tortiq etish uchun astoydil intildik. O'zingiz ko'rdingiz, yigitlar maydonning har bir qismida jiddiy kurash olib borishdi. Intriga o'yinning so'ngi soniyalarigacha saqlanib turdi. Bugun chiroyli futbol ko'rmadik, kurashlarga boy va asabiy ruhda o'tgan uchrashuv bo'ldi.

Natijadan albatta qoniqdim. Durang adolatli bo'ldi. Qo'lga kiritilgan har bir ochko alohida qadrli. Biz bugun CHempionlar ligasida o'ynaydigan kuchli jamoaga qarshi maydonga chiqqandik, durang natija yomon emas, murabbiy sifatida qoniqish hosil qildim. Boisi, biz ancha vaqt davomida bir kishi kam bo'lib o'ynadik.

- Stadion bugungi o'yinga tayyor ekani haqida malumot berilgandi. "Nasaf" bosh murabbiyi maydon xolati bo'yicha etiroz bildirdi. Bu xolatga sizning munosabatingiz qanday?

- "Andijon"ning juda ko'plab muxlislari bor, ularga katta futbol kerak. Klub rahbariyati buni tushungan xolda harakat qildi. Maydon maysalari bo'yicha mutaxassislar bor, ular qachon futbol o'ynash mumkinligi yoki mumkin emasligini yaxshi bilishadi.

Qaytaraman, bugungi o'yin biroz asabiy kayfiyatda o'tdi. Bir uchrashuvda 2 ta qizil kartochka ko'rsatilgani ham yuqoridagi fikrimni tasdiqlab turibdi.