Abramovning Qozog'istonda ishlashiga qanday qaraysiz? (So'rovnoma natijalari)

O'tgan to'rt kun ichida jami 103 kishi bu so'rovnomada qatnashibdi. Dastlab natijalarni keltirib o'tsak.

Yaxshi bo'ldi, har xolda bekor yurgandan ko'ra – 59 ovoz
O'zimizning klublardan taklif kutsa bo'lardi – 21 ovoz
Qozog'istonda futbol kuchli emas, bekor ketdi – 6 ovoz
Qaerda ishlashining menga farqi yo'q – 17 ovoz

Ko'rib turganingizdek, eng ko'p 59 kishi Abramovning Qozog'istonga ketganiga ijobiy baho bergan. 21 kishi ozroq kutsa bo'lardi degan manoda o'zimizning klublardan taklif tushishini kutsa yaxshiroq edi degan javobni maqul ko'rgan. 17 kishi uchun esa Abramovning qaerda ishlashining farqi yo'q ekan.  Va nihoyat 6 ishtirokchi Qozog'iston futboli kuchli emas, bekor ketdi degan javobda to'xtalgan.

Endi bu borada bizning fikrimizni keltiradigan bo'lsak, Vadim Karlenovichning qarorini hozircha to'liq quvvatlaymiz. CHunki o'ziga yarasha nom chiqargan murabbiyning bir yarim yil ishsiz yurishi katta muddat hisoblanadi. SHunday ekan, Abramov “Astana”ni tanlab to'g'ri qildi. Murabbiy u erda qozoq futboli bilan yaqindan tanishadi, Evropa futboli havosini totib ko'radi. Oramizda Qozog'istonda futbol saviyasi biznikidan past deyayotganlar ham yo'q emas. Lekin muhimi shundaki, ular rivojlanish uchun astoydil harakat qilishmoqda. Superligadagi hech bir klub jimgina qarab turgani yo'q.

O'z vaqtida bizda ishlagan Viktor Kumikov, Miodrag Radulovich, Viktor Pasulko, Vladimir Fomichev singari murabbiylar qozoq futbolida faoliyat olib borishdi va borishmoqda. Mana endi ular safiga Vadim Abramov ham qo'shildi va bundan faqat xursand bo'lishimiz kerak. Axir o'zbekistonlik murabbiylarning chet el futbolida ishlashi biz uchun yutuq emasmi? Abramov o'zimizda bekor yurib oliy liga klublaridan taklif kutsa bo'lardi, lekin bizda ko'p narsa nasiya ekanligini inobatga olsak, murabbiy uchun eng maquli naqdini tanlash edi va shunday qildi ham.

Abramov – kuchli va obro'li mutaxassis. U allaqachon chempionlik uchun kurashadigan klublarda ishlash saviyasiga etgan. Uning uchun “Navbahor”, “Qizilqum”, “Dinamo” singari doim muammolar atrofida o'ralashib yuradigan jamoalarda ishlash qiziq bo'lmasa kerak. Qolaversa, bugungi kunda unga “Paxtakor”, “Bunyodkor”, “Lokomotiv” va “Nasaf” singari kuchli to'rtlikdan taklif tushmasa ham kerak. Qozog'iston chempionatida ishlash esa uning uchun yangi maktab sanaladi.

Qaerda ishlashining farqi yo'q deganlar esa nazarimizda, murabbiy qaerda bo'lmasin ishlasa bo'ldi mazmunida ovoz berishgan. Eng muhimi, murabbiy ishsiz qolmasa bo'lgani. O'ylaymizki, Vadim Karlenovich “Astana”ni tanlab to'g'ri yo'l tutdi. Qozog'istonlik jurnalistlarning yozishicha, ular “Astana”ga Lui Van Gal, Slavolyub Muslin kabi nomdor murabbiylarning kelishini kutishgan ekan. Oxir-oqibat ular uchun Abramov nomi syurpriz bo'ldi. Va bazilar bunga hattoki qarshi chiqishdi yoki bo'lmasa kinoyali kulib qo'ya qolishdi. Abramov oldida esa bitta yo'l qoldi: faqat mehnat orqali kimligini butun Qozog'istonga namoyish etish. Bu borada u kishiga omad tilab qolamiz.

Xayrulla Xoliqov.

Saytimizda chiqqan yangi so'rovnomada ishtriok etishni unutmang.