Abduqodir Husanovga "Manchester Siti" muxlisidan maktub

Manchester shahrida uch kundan beri yog'ingarchilik tinmayapti. SHahar ko'chalari huvillab qolgan, odamlar uylaridan chiqmay o'tirishibdi. Bir necha kilometrlar nariroqda "Etihad stadium" savlat to'kib turibdi. Yuqoridan razm solganda, stadion g'ildirakli konkiga o'xshab ketadi. Biroq havo harorati pasaygandan beri "g'ildiraklar" muzlab qolgan shekilli, sevimli jamoam oldinga harakat qila olmay qoldi. Moviy o'rindiqlar qarshisida moviy osmon ostida moviy rangli libosdagi futbolchilarning xursandchiliklarini tomosha qilish o'zgacha zavq bag'ishlaydi. Ammo so'nggi paytlarda osmonimizni qora bulut qoplagandek go'yo. Qora bulutlarni bartaraf etib, moviy osmonimizni qaytaradigan qandaydir kuch kerak bizga.

Bizning ko'chada deyarli hamma uylar bir xil ko'rinishda — pishiq g'ishtdan qurilgan hamda ikki qavatdan iborat. Ko'cha boshida yashovchilar devor o'rniga bo'ta bilan uy atrofini o'rashgan. Ko'chamiz tor bo'lishiga hamda yo'l chetida mashinalar bo'lishiga qaramay, katta tirbandlik kuzatilmaydi. Mashinalar 20 kilometr tezlikda harakatlanadi, tor ko'cha va yaqin atrofimizda maktab joylashgani uchun tezlik chegaralangan.

To'rt devor orasida nima qilishni bilmasdan, yostig'imni quchoqlaganda, ijtimoiy tarmoqlarga sho'ng'iyman. Sevimli jamoam haqida xabarlar yod bo'lib kegan bo'lsa-da, baribir nimadir yangilik kutaveraman. So'nggi paytlarda bir nom diqqatimni tortdi: Husanov.

Husanov... Bu nom xayolimga o'rnashib qolgandi. Uning o'yinlarini YouTube'dan ko'rganman va uni afsonaviy film qahramoni Xalkka o'xshatganman – chaqqon, jasur, hattoki biroz qo'pol! Maydonda xuddi arslonday vajohatli harakat qiladi. Garchi uning qarshisida futbol o'ynayotgan bo'lmasam-da, dadil va shiddatli harakatlaridan videoni ko'rish davomida cho'chib ketib, telefonimni qo'limdan tushirib yubordim. Ehtimol, ko'z o'ngingizda Ramos gavdalangandir. Yo'q, u Ramoschalik jazavaga berilmaydi.

To'g'risi, avvaliga uning notanish ismi g'alati eshitildi. Ab-du-qo-dir... bu ism nima mano anglatishini bilmasdim. Lekin keyin... keyin uning o'yinlarini ko'rib, fikrim o'zgardi. Bu yigitda nimadir bor edi. U oddiy futbolchi emasdi. Unda o'zgacha bir ishtiyoq, o'zgacha bir kuch bor edi.  

Husanov Osiyoda joylashgan O'zbekiston degan mamlakatdan kelgan ekan. Rostini aytsam, O'zbekiston haqida deyarli hech narsa bilmasdim. Ko'pincha Afg'oniston yoki Pokiston bilan adashtirardim. Ammo o'smirlarimiz jahon chempionatida o'zbekistonliklarga yutqazib qo'ygach hamda ularning futbol jamoasi Olimpiya o'yinlarida ishtirok etgach, bu mamlakatga nisbatan qiziqishim oshdi.

Abduqodir Husanov deb aytishga tilim kelishmayotgan bo'lsa-da, tez orada ko'nikib ketsam, ajabmas. Har holda internetda to'g'ri yoza olaman. Mashhur insayder Fabricio Romano u ham shunchalik ko'p yozdiki, so'nggi marta faqatgina Mbappening "Real Madrid"ga transferi bilan shunday bo'lgandi. Otam esa ijtimoiy tarmoqlarga qiziqmaydi, goh-gohida ko'rsatkich barmog'ini burnining ustiga olib borib, ko'zoynagini to'g'rilagan holda haligacha gazeta mutolaa qiladi. Bazan menga sport yangiliklarini aytib qoladi, men bu xabarni allaqachon bilib ulgurganimga qaramay, uni ranjitmaslik maqsadida "Yo'g'-ey, chindanmi" deb qo'yaman. Otam ham futbol haqida mendan kam malumotga ega emas, haligacha almisoqdan qolgan, ammo uning uchun qadrdon bo'lgan hamda sevimli klubi futbolchilarining imzosi hamda ramzi tushirilgan sharfini elkasiga tashlagancha, stadionga borib turadi. Men gohida otam, gohida o'rtoqlarim bilan o'yinga tushaman.

Manchesterda hayot shiddat bilan, ammo o'ziga xos tartibda kechadi. Bu erda hamma narsa futbol atrofida aylanadi desam, mubolag'a bo'lmaydi. 

Ertalabdan odamlarning qo'lida gazeta, metro va avtobuslarda futbol haqida bahs-munozaralar avjiga chiqadi. Hattoki, itlarni sayr qildirib yurgan qariyalar ham kechagi o'yin haqida gaplashib, bir-birlari bilan bahslashishadi. Kimdir "Siti"ni, kimdir "Yunayted"ni maqtaydi.

Pablarda esa haqiqiy bayram bo'ladi! Muxlislar sevimli jamoalarining o'yinini katta ekranlarda tomosha qilib, pivo ichishadi, qo'shiqlar aytadi, baqirishadi, xullas, futbol zavqiga berilishadi. Bazida bu "bayramlar" yoqimsiz janjallar bilan yakunlanadi, lekin bu ham futbolga bo'lgan muhabbatning bir ko'rinishi desam mubolag'a bo'lmaydi.

Bir kuni do'stim bilan "Etihad Stadium" stadioniga bordik. Stadion turi vaqtida gid bizga qiziqarli voqeani so'zlab berdi: bir muxlis shunchalik futbolga mukkasidan ketganki, o'z to'yini stadionda o'tkazibdi! Kelin esa to'y libosi o'rniga "Siti" libosini kiyib kelibdi!

Manchesterda futbol nafaqat sport, balki hayot tarzi hamdir. Bu erda futbolsiz hayotni tasavvur qilib bo'lmaydi. Men ham futbolga shunchalik qiziqib qolganmanki, har kuni ertalab uyg'onib, birinchi navbatda futbol yangiliklarini o'qiyman...

Aytgancha, Husanovning transferi haqida gap-so'zlar boshlangach, "Manchester Siti"ning ijtimoiy tarmoqdagi sahifalari uning hammyurtlarining izohlari bilan to'lib-ketdi. Men hayratga ham tushdim: Xitoy va Hindistonda aholi soni nihoyatda ko'p ekanligini eshitganman, menimcha, Husanov yashayotgan yurt aholisi ham ancha-muncha ekan. Ularning izohlariga tushunmayman, ammo mamlakatining bayrog'i va qo'llab-quvvatlovchi smayllardan Abduqodirga omad tilayotganini anglayman.

"Tumanli Albion"ga xo'sh kelibsan, Abduqodir! Menimcha, sen ham sovuqni yoqtirmasang kerak, chunki yurtingizda havo harorati pasayishi bilan odamlar uylarida dam olish o'rniga tirikchilik ilinjida turnaqator navbatlarga turishar ekan. Biroq sen Franciyada yashading va Evropa ob-havosiga moslashding deb o'ylayman. 

Sen tufayli O'zbekiston degan mamlakatga qiziqishim oshdi, qachondir u erga sayohat qilaman degan umiddaman. Internet orqali O'zbekistonning tarixiy maskanlari va madaniyati haqida malumotlarga ega bo'lib, juda ijobiy taassurotlar oldim. O'ylaymanki, yurtingda sen kabi iqtidorli futbolchilar etarlicha.

Bir kuni sen bilan uchrashaman va moviy libosga bitgan dastxatingni qabul qilaman, degan umiddaman. Here we go!

P.S. Aytgancha, "paxta qo'yish" nima degani? Bu erda ko'pchilik uning manosini so'rashyapti. Jurnalistlar Husanovdan intervyu olganda, bu haqda, albatta, so'rashsa kerak deb o'ylayman.

Oqil Abdubarnoev tayyorladi.