Abdumalik Abdullaev: "Qo'l ostida o'ynagan murabbiylarim orasida Baxtiyor Ashurmatov eng zo'ri"

Futbolchi ayni kunlarda jamoa bilan Birinchi liganing navbatdagi tur uchrashuvlariga tayyorgarlik ko'rmoqda.

Saytimiz muxbiri Abdumalik Abdullaev bilan intervyu tashkil etdi.

- Abdumalik, siz aslida qaysi klub tarbiyalanuvchisi hisoblanasiz?

- Men o'zi asli Namangan shahrida tug'ilganman va "Navbahor" klubi tarbiyalanuvchisiman. Faoliyatimni aynan "Navbahor" o'rinbosarlari safida boshlaganman. Birinchi murabbiyim Lyan Aleksandr Nikolaevich hisoblanadi.

- Hozirda Buxoro viloyatining "G'ijduvon" klubi safiga qo'shildingiz. Jamoa oldidagi rejalar qanday?

- Davralar oralig'ida "G'ijduvon" klubidan chorlov bo'ldi va jamoa tarkibiga qo'shildim. Klub rahbariyati futbol o'ynash uchun bizga barcha sharoitlarni yaratib bermoqda. Bugunga qadar 4 ta o'rtoqlik o'yini o'tkazdik, 3 ta g'alaba va 1 mag'lubiyat. Mavsumning qolgan qismiga jiddiy tayyorlanayapmiz, jamoa oldiga Birinchi liga g'olibligini qo'lga kiritish vazifasi qo'yilgan.

- Siz hujumchi ampulasida o'ynaysiz, milliy chempionatlarimizda ilk urgan golingizni xotirlaysizmi?

- "Navbahor" o'rinbosarlari safida o'ynab keyinchalik Oliy ligada debyut qilgandim. Birinchi golim aynan debyut o'yinimda bo'lgan, o'shanda "Navbahor" safida "Lokomotiv" darvozasiga to'p kiritgandim.

- Bugunga qadar ko'plab murabbiylar qo'l ostida o'ynagansiz. Ular orasida qaysi murabbiy sizda eng yaxshi taassurot qoldirgan?

- Qo'l ostida o'ynagan murabbiylarim orasida hozirgi kunda "Qo'qon-1912" bosh murabbiyi Baxtiyor Ashurmatov menda iliq taasurot qoldirgan. Baxtiyor aka men uchun eng zo'r murabbiy hisoblanadi. U kishi bilan "Navbahor"da ham birga ishlaganmiz. SHuningdek AGMK jamoasi safida, aynan Ashurmatov qo'l ostida O'zbekiston kubogini yutganmiz.

- Hozirga qadar milliy chempionatlarimizda urgan gollaringiz soni nechta?

- Quyi ligalarda ko'plab gollar urib kelmoqdaman. Oliy ligada urgan gollarim soni unchalik ko'p bo'lmagan, 10 bor raqiblar darvozasini ishg'ol qilganman.

- AGMK safida tajribali yarim himoyachi Jasur Hasanov bilan o'ynagansiz. Siz ham Hasanov kabi tezkor futbolchi hisoblanasiz. Aytingchi, bu jamoa uchun qanchalik naf keltirgan?

- Jasur aka juda kuchli va tezkor futbolchi hisoblanadi. U kishi bilan birga o'tkazgan o'yinlarimiz jamoamiz uchun foydali chiqqan deb ayta olaman. Hozirda "G'ijduvon" safida aynan Jasur Hasanov o'ynaydigan nuqtada o'zimni sinab ko'rayapman.

- Superligada qaysi jamoaga muxlislik qilasiz?

- Albatta "Navbahor", birinchi o'ynagan klubim va o'zim tug'ilgan viloyat bosh jamoasi hisoblanadi.

- Xorij chempionatlaridachi?

- Xorijda "Real Madrid" klubining ashaddiy muxlisiman. Bu jamoa ishtirokidagi o'yinlarni qoldirmay kuzatib boraman.

- Hozirda O'zbekistonning eng kuchli futbolchisi kim deb hisoblaysiz?

- Eldor SHomurodov.

- Dunyo bo'yichachi?

- Krishtianu Ronaldu.

- Muxlislarga tilaklaringiz qanday? Fursatdan foydalanib ularga dil izhorlaringizni yo'llashingiz mumkin...

- Menda muxlislari iliq taasurot klublar soni 3 ta. "Navbahor", "Andijon" va "Dinamo" jamoalarida o'ynaganimda stadionda hamisha muxlislar bilan to'la atmosfera bo'lardi. Barcha o'zbek futbol muxlislarini yaxshi ko'raman va ularga eng ezgu tilaklarni yo'llagan bo'lardim, hamisha sog'-salomat bo'lishsin.

Bekzod Tolibov yozib oldi