6111 kun yoxud Jiji Buffonning ko'z yoshlar bilan yozgan maktubi

6111 kun

6111 haqiqiy ehtirosli onlarga boy o'tgan kun. Xursandchilik, ko'z yosh, mag'lubiyat va g'alaba.

Rahmat.

Har birlaringizga alohida rahmat. CHunki har bir muxlis meni oq-qora libosdagi hayotimni o'zgacha o'tishiga hissa qo'shdi. Bu oq-qora tanamning ikkinchi ranggiga aylandi. Men yaxshi ko'rib, sharaf bilan egnimda va qalban kiyib yurgan oq-qora rang menga doimo hamrohlik qildi. Bu libosni doim chin yurakdan himoya qildim.

Ertaga yo'l tugaydi. Birgalikda yozgan kitob tugaydi. Ichim ajib his-tuyg'ularga to'la. Ishoning, juda hayajondaman. His-tuyg'ular juda ko'p. Endi yangi yo'l boshlanadi. Yangi kitob. "Yuventus" uchun yangi yo'l boshlanishi lozim. CHunki "Yuventus" nomi har qanday futbolchidan ustun turadi. Jamoaning yangi yo'li boshlanish arafasida. "Yuve" o'zining kitobidagi yangi muhim sahifalarni yozishda davom etadi. "Yuventus"ning bu kitobi tugallanmas, menimcha.
CHunki "Yuventus" noyob, takrorlanmas va sehrli DNKga ega jamoa.

"Yuventus" - oila. Mening oilam. Men bu jamoani yaxshi ko'rishdan hecham to'xtamayman. "Yuventus"dan juda minnatdorman va o'zimni "uyim" deb atayman. CHunki "Yuve" menga juda ko'p narsa bergan. Hamma narsa. Jamoa menga men klubga bergan narsalardanda ko'prog'ini bergan.

Endi yangi yo'l boshlanmoqda. Yangi kitob. CHunki yangi yo'l boshlanishi lozim.

Endi men kelajakka boshqacha ko'zlar bilan qarashni o'rganaman. Hayot menga taklif qiladigan yangi chaqiruvlarni qabul qilaman. CHunki men o'yindan tashqari holatda qolishni xohlamayman. Ko'p kurashlar, to'qnashuvlar, g'alaba va mag'lubiyatlarni boshdan kechirgan, tabiiy qurquvlardan o'tgan inson sifatida avvalgisi bilan yangisi bir-biridan farq qilishini juda yaxshi tushunaman. SHu boisdan ham bu qiyin.

Yoshligimda stadionga velosipedda kelgandim. Ertaga men stadionni hayolan piyoda tark etib, ajralish qanchalik qiyin ekanini yana bir bor his etishni istayman. Xayrlashuv quvonchini to'la his etmoqchiman. Hayajonni his etishni xohlayman. Men o'z uyim deb his etadigan joyimdan hech qachon uzoqlashmaslikni tushunib etmoqchiman. Har doim! Jamoadoshlarim, do'stlarim va doimo meni aka-ukalarim bo'lib qoladigan qadrdonlarim bilan ham hayolan birma-bir xayrlashib chiqishni istayman.

So'nggiga qadar! Doim sizniki! Janluiji Buffon.