4-tur. Bugungi to'rtta o'yinida imkoniyatlar qanday?

Qo'qon-1912 (Qo'qon) – Andijon (Andijon)
11 aprel 2015. Qo'qon. "Markaziy" stadioni. 16:00
Hakamlar: H.Ro'ziev, O.Abduvosilov, A.Kalinin, A.Rubakov.
Nazoratchi: A.Abdullaev.
Imkoniyatlar: 55-45%



Va nihoyat qo'qonliklar orziqib kutgan kun ham keldi. Yillar ketdi bu kunning kelishi uchun. Mana, oliy liganing 4-turiga kelib "Qo'qon-1912" o'z maydonida, oliy ligada, bo'lib ham vodiy derbisida muxlislar oldida saf tortadi.

Mavsumni ko'taringki kayfiyatda boshlagan Rustam Abdullaev jamoasi bu o'yinga ancha jiddiy tayyorgarlik ko'rdi. G'alaba qozonish imkoniyati ham chakki emas, boisi raqib bugungi kungacha bironta ochko ishlamagan. Uchrashuvda Quvondiq Ro'ziev ishtirok eta olmaydi. "Qo'qon-1912"ning zaxira o'rindig'idan kelib chiqsa, bu jiddiy yo'qotish bo'lishi mumkin.

"Andijon" avvalgi 3ta o'yinda o'z darvozasidan 8ta gol o'tkazib yuborgan. Lekin o'yin vodiy derbisi maqomini olishini inobatga olsak, Gess uchun ham bu o'yin o'ta muhim.


SHo'rtan (G'uzor) – Dinamo (Samarqand)  
11 aprel 2015. G'uzor. "G'uzor" stadioni. 16:30
Hakamlar: SH.Qosimov, R.Fozilov, M.Majidov, SH.Qayumov
Nazoratchi: I.Nexochin
Imkoniyatlar: 55-45%



"Dinamo" yaxshi maydonda yaxshi o'ynaydigan jamoalar sirasiga kiradi. Bunday maydon G'uzorda mavjud. Aynan shu omil ikki jamoa o'rtasida teng kurashga boy bo'ladigan o'yin bo'lishiga asos bo'la oladi. "SHo'rtan" 3-tur o'yinini o'tkazib yubordi, "Dinamo" esa alamli tarzda ochkolarni boy berdi. Ruhiy tomondan Qurbonovning jamoasida ustunlik bor. Tarkib borasida tenglik. "Dinamo"ning himoyasi chakki harakat qilmayapti.


Navbahor (Namangan) – So'g'diyona (Jizzax)
11 aprel 2015. Namangan. "Markaziy" stadioni. 17:00
Hakamlar: B.Namozov, T.Galeev, A.Po'latov, A.Rahimov
Nazoratchi: R.Aytekov.
Imkoniyatlar: 60-40%



Agar "Navbahor" shu o'yinda ham g'alaba qozona olmasa, ikkinchi davrada "So'g'diyona" va "Andijon" homiylar tomonidan pul bilan taminlansa namanganliklarning turnir jadvalidagi ahvoli ancha og'irlashib qolishi mumkin. Tarkib chetdan qaraganda yomon emas, ammo g'alaba yo'q. To'rtinchi turga kelib jamoa o'z maydonidagi uchinchi o'yinini o'tkazadi. Uydagi ochkolar oltinga teng.


Metallurg (Bekobod) – Neftchi (Farg'ona)
11 aprel 2015. Bekobod. "Metallurg" stadioni. 16:00
Hakamlar: V.Ceytlin, T.Gaynulin, N.Ro'zimov, R.Lutfulin
Nazoratchi: D.Roman.
Imkoniyatlar: 50-50%



Bu o'yinda imkoniyatlar teppa-teng. Turnir jadvalidagi qo'shnilar. Ikkisi ham "Lokomotiv"dan bir ochko oldi, ikkisida ham 2tadan durang va bittadan g'alaba bor. To'plar nisbati ham bir xilda - 3:2. O'yinning Bekobodda bo'lishi biroz "Metallurg"ga ustunlik beradi, ammo raqib safidagi futbolchilarning mahorati imkoniyatlarni tenglashtiradi. Mag'lub bo'lmagan jamoalardan biri yutqazadimi yoki yana durang, buni Bekobodda bo'lib o'tadigan o'yindan keyin bilib olamiz.

"So'g'diyona"ning ishi esa ancha og'irlashib qolgan. Agar futbolchilar o'z imkoniyatlari darajasidan yuqori o'ynab ochkolarni qo'lga kiritmasalar, Davron Fayziev hech qanday selekciya bozorida ishtirok eta olmaydi.