26-Ko'rfaz Kubogi tugadi. Bahrayn - chempion!

Bu yilgi musobaqa qiziqish nihoyatda yuqori bo'lgani hamda teletranslyaciya sifatining yanada oshgani bilan yodda qoldi.

Tarixga nazar

Arab Ko'rfaz Kubogi futbol federaciyasi 1970 yilda tashkil topgan bo'lib, 8ta mamlakat azo hisoblanadi. Ushbu federaciyasini tashkil qilish g'oyasi 1968 yilgi Olimpiya o'yinlari paytida yuzaga kelgan. SHundan so'ng federaciya tashkil qilinib, birinchi Ko'rfaz Kubogi o'tkazilgan va ilk g'olib Quvayt bo'lgan. 

Umuman olganda Quvayt terma jamoasi ushbu musobaqada eng ko'p g'oliblikni qo'lga kiritgan. Ko'rfaz Kubogi shu paytgacha 26 marta o'tkazilgan bo'lsa, shundan 10tasida Quvayt zafar quchgan. Iroq 4 marta, Saudiya Arabistoni bilan Qatar esa uch martadan g'olib bo'lgan.

2009 yil o'tkazilgan Ko'rfaz Kubogi yangicha yo'nalishdagi translyaciya bilan yodda qoldi. Qatarning "Al Jazira" telekompaniyasi o'yinlarni efirga uzatishni o'z zimmasiga oladi va musobaqa ilk bor HD formatda muxlislarga taqdim etiladi. O'z vaqtida FIFA sobiq prezidenti Zepp Blatter hamda UEFA sobiq rahbari Mishel Platinining musobaqaga tashrifi Ko'rfaz Kubogiga bo'lgan etiborni yanada oshirib yuboradi. Hatto 2013 yil 4 oktyabr kuni bo'lib o'tgan FIFA Ijroqum yig'ilishida musobaqani FIFA xalqaro taqvimiga kiritish masalasi ko'tariladi.

Mezbon mamlakatlar va chempionlar

Quyida Ko'rfaz Kubogiga mezbonlik qilgan mamlakatlar hamda chempion jamoalar nomini keltirib o'tamiz.

1970. Mezbon - Bahrayn. CHempion - Quvayt

1972. Mezbon - Saudiya Arabistoni. CHempion - Quvayt

1974. Mezbon - Quvayt. CHempion - Quvayt

1976. Mezbon - Qatar. CHempion - Quvayt

1979. Mezbon - Iroq. CHempion - Iroq

1982. Mezbon - BAA. CHempion - Quvayt

1984. Mezbon - Ummon. CHempion - Iroq

1986. Mezbon - Bahrayn. CHempion - Quvayt

1988. Mezbon - Saudiya Arabistoni. CHempion - Iroq

1990. Mezbon - Quvayt. CHempion - Quvayt

1992. Mezbon - Qatar. CHempion - Qatar

1994. Mezbon - BAA. CHempion - Saudiya Arabistoni

1996. Mezbon - Ummon. CHempion - Quvayt

1998. Mezbon - Bahrayn. CHempion - Quvayt

2002. Mezbon - Saudiya Arabistoni. CHempion - Saudiya Arabistoni

2003/04. Mezbon - Quvayt. CHempion - Saudiya Arabistoni

2004. Mezbon - Qatar. CHempion - Qatar

2007. Mezbon - BAA. CHempion - BAA

2009. Mezbon - Ummon. CHempion - Ummon

2010. Mezbon - Yaman. CHempion - Quvayt

2013. Mezbon - Bahrayn. CHempion - BAA

2014. Mezbon - Saudiya Arabistoni. CHempion - Qatar

2017/18. Mezbon - Quvayt. CHempion - Ummon

2019. Mezbon - Qatar. CHempion - Bahrayn

2023. Mezbon - Iroq. CHempion - Iroq

2024/25. Mezbon - Quvayt. CHempion - Bahrayn

2026. Mezbon - Saudiya Arabistoni. CHempion - ???

Bu yilgi musobaqa haqida

26-Ko'rfaz Kubogi bu safar Quvaytda tashkil etildi va o'tgan yilning 21 dekabr kuni start oldi. Kecha, 4 yanvar kuni esa final uchrashuvi o'tkazilib, bunda Bahrayn Ummon terma jamoasini 2:1 hisobida mag'lub etdi.

Musobaqada 8ta jamoa ishtirok etdi. Jamoalar to'rttadan ikki guruhga bo'lindi.

A guruhi - Ummon, Quvayt, BAA, Qatar.

B guruhi - Bahrayn, Saudiya Arabistoni, Iroq, Yaman.

Etiborli jihati, JCH-2026 saralash o'yinlarida bizga raqiblik qilayotgan BAA va Qatar bitta guruhda bahs olib bordi va har ikkalasi guruhdan chiqa olmadi.

Quvayt terma jamoasi ishtirokidagi o'yinlarda stadionga juda ko'plab muxlislar tashrif buyurdi. Masalan, Quvayt - Ummon o'yiniga 42 ming, BAA - Quvayt uchrashuviga 48 ming, Quvayt - Qatar bahsiga esa 57 mingdan ziyod muxlis keldi. Bundan tashqari 28 dekabr kuni o'tkazilgan Iroq - Saudiya Arabistoni bahsini kuzatish uchun 55 ming ishqiboz tashrif buyurdi.

Guruh bosqichi yakunlariga ko'ra Ummon va Quvayt, Bahrayn hamda Saudiya Arabistoni terma jamoalari keyingi bosqichga yo'l oldi. Yarim finalning birinchi o'yinida Ummon Saudiya Arabistonidan 2:1 hisobida ustun kelgan bo'lsa, ikkinchi bellashuvda Bahrayn mezbon Quvaytni  1:0 hisobida mag'lub etib musobaqadan chiqarib yubordi.

31 dekabr oqshomida o'tkazilgan Bahrayn - Quvayt yarim final bahsini ko'rish uchun stadionga 60 ming muxlis keldi. Final o'yinini esa 58 ming muxlis stadionda kuzatib bordi.

Teletranslyaciya va mukofot jamg'armasi

Ko'rfaz Kubogining barcha o'yinlari Bahrayn, Iroq, Quvayt, Ummon, Qatar, Saudiya Arabistoni, BAA va Yaman telekanallari orqali to'g'ridan to'g'ri uzatildi. SHuningdek, musobaqa AQSH, Niderlandiya va Portugaliyada ham namoyish etildi.

CHempionlikni qo'lga kiritgan Bahrayn terma jamoasi 1 million, vice-chempion Ummon esa 750 ming dollar pul mukofoti bilan taqdirlandi.

Musobaqa yakuniga ko'ra, Bahrayn terma jamoasi yarim himoyachisi Mohamed Marhun "Eng yaxshi futbolchi" hamda bahraynlik darvozabon Ebrahim Lutfalla "Eng yaxshi darvozabon" deb topildi.

Kimlar murabbiylik qildi?

SHu o'rinda musobaqa paytida terma jamoalarni qaysi murabbiylar boshqarganini ham keltirib o'tamiz.

Quvayt - Xuan Antoni Picci (Ispaniya)

Ummon - Rashid Jaber (Ummon)

Qatar - Luis Garsiya (Ispaniya)

BAA - Paulo Bentu (Portugaliya)

Bahrayn - Dragan Talayich (Xorvatiya)

Iroq - Xesus Kasas (Ispaniya)

Saudiya Arabistoni - Erve Renar (Franciya)

Yaman - Nuriddin Ould Ali (Jazoir)

Navbatdagi Ko'rfaz Kubogiga 2026 yil Saudiya Arabistoni mezbonlik qiladi. Bunda ham 8ta terma jamoa ishtirok etadi va sentyabr oyida o'tkazish rejalashtirilgan.

X.Xoliqov