10 ta poziciyada o'ynay oladigan Urbi Emanuelson hozir qaerda?
23 iyu 2021 02:09
Yangiliklar

10 ta poziciyada o'ynay oladigan Urbi Emanuelson hozir qaerda?

O'tmishda muxlislarning diqqat markazida bo'lgan, ammo so'nggi paytlarda katta sahnadan biroz chekingan futbol kishilari haqida malumot beruvchi ruknimiz davom etadi.

Niderlandiyaning barcha yosh toifadalaridagi terma jamoalarida o'ynagan Urbi Emanuelson "Ayaks" tarbiyalanuvchisi hisoblanadi. U katta futbolga 2005 yilda aynan Amsterdam klubi orqali kirib kelgandi.

Bilasiz, futbol olamida universal o'yinchilar qadrlanadi. SHu tufayli "Ayaks" akademiyasi tizimida bunga alohida etibor qaratiladi. Odatda mudofaaning markaz va qanot chiziqlarida o'ynay oladigan himoyachilarga nisbatan ham universal sifati qo'llaniladi. Urbi esa faoliyati davomida 10 ta poziciyada o'ynashga ulgurgan kam sonli futbolchilardan.

Emanuelson aynan shu xususiyati tufayli 2011 yilda "Milan" tomonidan xarid qilindi. "Rossonerilar" bu orqali jamoadan ketgan Marek Yankulovskiyning o'rnini to'ldirish bilan birga lozim paytda maydon markazini kuchaytirish imkoniyatiga ega bo'ldi.

"Milan"dan keyin "Roma", "Verona" va "Atalanta" singari jamoalar sharafini himoya qilgan futbolchi allaqachon 35 yoshga qadam qo'ydi. Biroq, sportdan ketish haqida o'ylayotgani yo'q. Urbi bugungi kunda "Utrext" sharafini himoya qilyapti. Uning niderland klubi bilan amaldagi shartnomasi 2023 yilning yoziga qadar mo'ljallangan.