"Qizilqum" muxlislari Gulistonga borishadi

Elitada o'z o'rnini saqlab qolish uchun astoydil kurashayotgan Guliston - Qizilqum jamoalari uchrashuviga kattayu kichik birdek qiziqmoqda.
 
Ikkinchi davrada o'z o'yinini topishga muvaffaq bo'lgan “Qizilqum”ning qo'lga kiritgan g'alabalarida jamoa ishqibozlarining ham juda katta hissalari bor, albatta. Qiyin va og'ir ahvolda ham minglab muxlislar “Qizilqum”ni bir zum ham yolg'izlatib qo'yishgani yo'q. Ayniqsa, jamoa uy uchrashuvlarini Navoiyda o'tkaza boshlagach, ishqibozlarning stadionga tashrifi sezilarli darajada ortganligini alohida takidlash lozim.
 
Qolaversa, keyingi paytlarda “Qizilqum” jamoasi qoshida ish boshlagan ishqibozlar klubi faolligi ham etiborga loyiq. Jumladan, ikkinchi davrada Samarqand va Zominda o'tkazilgan uchrashuvlarda ular o'z jamoalarini qo'llab-quvvatlashda faolliklarini namoyish etdilar.
 
Gulistonda bo'ladigan uchrashuvga ham Navoiydan uch yuz nafardan ziyod muxlis tashrif buyurishi kutilmoqda. “Qizilqum” futbol klubi rahbariyati va homiylari jamoani stadionning o'zida bevosita qo'llab-quvvatlashni istovchilarga hayrixohlik bildirib, ular uchun barcha zarur shart-sharoitlarni yaratib beryapti. Jumladan, 8 noyabr tongida navoiylik muxlislar uchun ajratilgan maxsus avtobuslar Guliston shahri tomon yo'l oladi.
 
Umid qilamizki, yuzlab ishqibozlarning olqish va hayqiriqlari nihoyatda muhim uchrashuv davomida “Qizilqum” futbolchilari uchun chinakam kuch va dalda vazifasini o'tab beradi. Muxlislar “Qizilqum”ning g'alabasiga ishonadilar. FAQAT OLG'A, “QIZILQUM”!