Chap qanot yarim himoyasida tezkor harakatlari va qulay pas oshirishi natijasida 28 yoshli futbolchi qo'qonlik ishqibozlarning suyuklisiga aylanib ulgurdi.

Oliy liganing 7-turidan so'ng saytimiz ijodkorlari tomonidan tuzilgan tur ramziy terma jamoasidan Sardor Eminov ham o'rin oldi. Shu munosabat bilan futbolchi bilan suhbatlashganimizda, o'zi uchun kutilmagan xol bo'lganini takidladi.

- Eng avvalo bunday etibordan xursand bo'ldim. Albatta o'zimni saytning doimiy o'quvchisiman deya olaman. Xususan har bir o'yindan so'ng ramziy terma jamoadan kimlar o'rin olganini kuzatib kelaman. To'g'risi, 7-turdan keyin ramziy terma jamoadan o'rin olishim men uchun kutilmagan o'ziga xos sovg'a bo'ldi.

- Endi “Buxoro” bilan qiyin kechgan o'yinga keladigan bo'lsak, kutilganidek bahs oson bo'lmadi. Buni oldindan his etgandik va astoydil tayyorgarlik ko'rgandik. Ko'z tegmasin jamoada ichki muhit a'lo darajada. Hamma bir-birini qo'llab-quvvatlaydi. Buxoroliklarni ham aynan hamjihatlik va ahillik evaziga yutdik. G'alabaga bo'lgan ishtiyoq yuqori edi. O'z muxislarimiz qarshisida o'ynadik. Ularni faqat uch ochko bilan xursand qilishimiz shart edi.

- Ko'rsatgan o'yinimga eng yaxshisi munosib bahoni muxlislar berishadi. Lekin ikkita pas berdim va gol bo'ldi. Bundan xursandman. Doimo maydonga chiqib, o'z vazifamni to'liq bajarishga urinaman.

- Orif Mamajonov bilan yaxshi tushunamiz. U bilan o'tgan yili “So'g'diyona”da o'ynaganimiz uchun ham maydonda va uning tashqarisida ham bir-birimizni oldindan yaxshi bilamiz. Shuning uchun o'yinlarda ham u meni fikrimni oldindan o'qiy oladi.

- Ilgari vodiy klublarida o'ynamaganman. Lekin vodiyda xalq futbolni juda ham ardoqlashini shu erga kelib tushunib etdim. Uydagi har bir o'yinimizda tribuna deyarli to'lmoqda. Albatta har bir futbolchi stadion ashaddiy ishqibozlar bilan to'lganda yanada kuchliroq va zavqlanib o'ynaydi. Masalan men Qo'qonda o'zimni shunday his etaman. Erishilgan g'alabamizda muxlislarning qo'llab-quvvatlashi muhim o'rin tutdi. Buning uchun ularga rahmat.

- Keyingi turni endi safarda “Qizilqum”ga qarshi o'tkazamiz. Hozir hamma klub bilan bemalol o'ynasa bo'ladi. Jamoalar saviyasi deyarli tenglashib qolgan. Ochkolar farqiga qarang, u qadar ko'p emas. Bu esa chempionatdagi intrigani ortishiga sabab bo'lyapti. Navoiydan ham ochko bilan qaytishga xarakat qilamiz.

Islombek Rustambekov suhbatlashdi.

Sardor Eminov: “Ramziy terma jamoadan o'rin olishimni kutmagandim”