Рустам Аъзамов энди “Навбаҳор” йиғинида

 Шу сабабли биринчи даврани асосан захирада ўз вақти келишини кутиб ўтирган айрим ўйинчилар, айни пайтда ўзларини бошқа клубда синаб кўришни ўйлаб юришибди. Масалан ҳимоячи Рустам Аъзамов катта эхтимол билан иккинчи даврани “Локомотив” таркибида эмас, балки бошқа жамоада ўтказиши кутилмоқда. 21 ёшли ҳимоячи ушбу жамоа тарбияланувчиси саналади. Темирйўлчилар сафида бир неча йиллардан буён тўп суриб келмоқда. Ортда қолган мавсумларда у кўпинча асосий таркибда ўйнаган. Аммо жорий мавсумда бош мураббий Ҳаким Фузайлов чап қанот ҳимоясида Шерзод Шарипов ёки Салим Мустафоевдан фойдаланаётганини кўрмоқдамиз. Шу боис Аъзамов ўйин амалиётини йўқотмаслик мақсадида бошқа клубга ўтишни ўйлаб турибди.
Бу ҳимоячи аввалига “Қизилқум” машғулотларида иштирок этаётганди. Аммо у шу кунларда қарорини ўзгартириб, “Навбаҳор”нинг Тошкентда ўтаётган йиғинига бориб қўшилди. Бу бежиз эмас албатта. Боиси яқинда наманганликларнинг мураббийлар штабида иш бошлаган Роберт Гай илгари ёшлар терма жамоасида (1992) ишлаган чоғида, Рустам Аъзамов ҳам номзод ўйинчилардан бири эди. Шу боис унинг имкониятларини мураббий жуда яхши билади. Бу эса футболчининг ўзига ҳам асқотиши турган гап. 

Исломбек Рустамбеков