Рўзиқул Бердиев: "Пенальти ўйин тақдирини ўзгартириб юборди"

- Ўйин ҳақида

- Футболда биринчи ўринда натижа туради. Йигитларимиз ўзларига ишонган ҳолда ҳаракатланишди, лекин пенальти ўйин тақдирини ўзгартириб юборди. Албатта, бунда футболчиларимизни айбламаймиз, бутун жамоа бўлиб ютқаздик. Қаердадир хатоларга, қаердадир эътиборсизликка қўл урдик. Мағлубиятга муносиб эмасдик, янги ва ёш таркиб билан амалдаги чемпионга қарши муносиб қаршилик кўрсатишга ҳаракат қилдик. Аламли томони, 2:0 олдинда бора туриб, ютқазиш бўлди, бу жуда аламли. Мағлубиятга бир нечта сабаблар бор, буни ўрганиб чиқамиз ва хулоса чиқарамиз.

- Чемпионлик учун қайси жамоалар курашади деб ўйлайсиз? "Пахтакор" билан кетма-кет 2 ўйинда қатнашдингиз, айнан "шерлар"ни фаворит дея оламизми?

- Ўтган йили "Пахтакор" ҳаммадан устун" дер эдик. Бу йил ушбу гапни ишонч билан айтолмайман. Бундан ташқари, бошқа жамоаларнинг мақсади жуда катта. Олдиндан қайсидир жамоани чемпион сифатида кўрсатиб бўлмайди, буни мавсум давомида билиб оламиз.

- Трансфер ойнаси 12 мартга қадар очиқ. Ҳужум чизиғи бўйича сизда танлов йўқ. Умуман, таркибга янги футболчилар жалб қилинадими?

- Мен жамоа ўзагини сақлаб қолишни жуда ҳам хоҳлаган эдим. Агар 3 нафар ўйинчимиз кетмаганида, бизга ҳеч қандай ўйинчи керак бўлмаган бўларди. Буни раҳбариятдан сўраган эдим, аммо афсуски, бу амалга ошмади. Менимча, 2 кунни ичида ўзгариш қилишимиз амримаҳол. Шу боис биринчи даврани мавжуд таркиб билан тугатсак керак.

- Файсал Траорени ўтган мавсум ҳам таркибда сақлаб қолмагандингиз, бу йил ҳам шундай бўлди. Бу савия билан боғлиқми?

- Файсал Суперлига даражасида ўйнамаган. Шунинг учун биз уни Пролига жамоасига ижарага бердик. Агар ўзини яхши тарафдан кўрсатса, кейинги мавсум жамоага қайтарамиз.