Ayni kunda jamoa a'zolari Navoiy shahrida kuniga ikki mahaldan mashg'ulot o'tkazishmoqda.
Jamoamiz tarkibidagi o'zgarishlarga to'xtaladigan bo'lsak, o'tgan yili “Qizilqum”da to'p tepgan Otabek Zokirov,Shukurali Po'latov, Otabek Isroilov, Akram Bahriddinov va Ilhom Yunusov jamoa bilan xayrlashdi. Ayni paytda navoiylik futbol ishqibozlariga yaxshi tanish bo'lgan Nemanya Yovanovich (Serbiya) va Grigoriy Kviseshvili (Gruziya) jamoamiz mashg'ulotlarida ishtirok etishmoqda. Shuningdek, “Neftchi”dagi yorqin o'yinlari orqali ishqibozlar etirofiga sazovor bo'lgan posbon Evgeniy Cheremisin (Rossiya) ham “Qizilqum” ko'rigida bo'lib turibdi. Bundan tashqari, Eldor Boymatov (“Sho'rtan”), Sarvar Xolmatov (“Surxon”), Doniyor Usmonov (“Navbahor”), Navro'z Alimov (“Qo'qon-1912”), Alisher Sanoev (“Buxoro”) singari futbolchilar ham jamoamiz tarkibida shug'ullanmoqda. Shuningdek, o'tgan mavsumda o'rinbosarlar safida harakat qilgan iqtidorli mahalliy futbolchilar Suhrob Yarashev va Husniddin Fazliddinov asosiy tarkib a'zolari bilan birga. Jamoamizning tajribali legioneri turkmanistonlik Artur Gevorkyan yaqin kunlarda safga qaytadi. Shuningdek, yig'in davomida gruziyalik hujumchi ham jamoa tarkibiga kelib qo'shilishi kutilmoqda.
Futbolchilarimiz 25 yanvarga qadar tayyorgarlikni Navoiyda davom ettirishadi. So'ngra o'quv-yig'in mashulotlari poytaxtimiz Toshkentda o'tkaziladi.
