Қирғизистон терма жамоаси бош мураббийи Крестинин Ўзбекистон билан ўйин бўлишини тасдиқлади

Бироз аввал сайтимизда Ўзбекистон терма жамоаси Қирғизистон билан ўртоқлик учрашуви ўтказиши ҳақида хабар бергандик. Айни дамда биз билан боғланган Қирғизистон терма жамоаси бош мураббийи Александр Крестинин ушбу ўйин ўтиши борасида келишувга эришилгани ҳақида хабар қилди.

Эшитдик-да: Ўзбекистон терма жамоаси Қирғизистон билан ўртоқлик ўйини ўтказади 

Ўйин 9 ноябрь куни бўлиб ўтиши режалаштирилган. Қирғизистон терма жамоаси эса Тошкентга 7 ноябрь куни учиб келади.

Эслатиб ўтамиз, ноябрда ФИФА кунлари доирасида Ўзбекистон терма жамоаси Тошкентда иккита расмий ўйин ўтказади. Саралаш босқичи доирасида дастлаб 14 ноябрь куни Саудия Арабистони меҳмон бўлса, кейинчалик 19 ноябрь куни Фаластинга қарши ўйин орқали иккинчи даврага старт берилади.

Айни пайтда терма жамоамиз ЖЧ-2022 ҳамда ОК-2023 қўшма саралаш босқичининг "D" гуруҳида 4-турдан кейин 6 очко жамғарган ҳолда пешқадамлик қилмоқда.