Ўзбекистон-U22 "Қўқон-1912"га мағлуб бўлди

Назорат учрашувидаги рақиб Ўзбекистон-U22 терма жамоаси бўлди. Ўйинда қўқонликлар кичик ҳисобда ғалаба қозонишди.

Баҳс кутилганидек қўқонлик футболчиларнинг ҳужумлари билан бошланди. Ана шундай ҳужумларнинг бирида, аниқроғи, 19-дақиқада олимпиячилар жарима майдончалари ичида қўқонлик футболчига нисбатан кўполик ишлатишди. Натижада бош ҳакам пенальти белгилади. Пенальтини эса "Қўқон-1912"нинг янги аъзоси Анвар Ҳожимирзаев аниқ амалга ошириб, ҳисобни очди.

31-дақиқада яна ўша тиниб-тинчимас Ҳожимирзаев рақиб дарвозасини ишғол этди. Ўнг қанотдан Муҳаммаданас Ҳасанов дарвоза томон зарба йўллаган эди. Тўп йўл-йўлакай Ҳожимирзаевга тегиб рақиб дарвозасидан ўрин олди. Жамоалар танаффусга шу ҳисобда чиқиб кетишди.

Иккинчи бўлим ҳам қўқонликларнинг фаоллиги билан бошланди. 68-дақиқада Мерзляков-Норбеков-Азимов комбинацияси гол билан тугаши мумкин эди. Азимовнинг зарбасини дарвозабон аранг қайтаришга улгурди. 76-дақиқада ҳисобни қисқарди. Ҳумоюнмирзо Иминов жарима зарбасини қойилмақом тарзда ижро этди. Қолган дақиқаларда жамоалар қанча уринишмасин, ҳисобни ўзгаритиш ҳеч кимга насиб этмади.

Назорат учрашуви.
Ўзбекистон-U22 - "Қўқон-1912" - 1:2
Голлар: Ҳумоюнмирзо Иминов (76) - Анвар Ҳожимирзаев (19 пенальти,31).
“Қўқон-1912”: Элдор Адхамов, Илхом Ваҳобов, Бобур Акбаров, Авазхон Маматхўжаев, Славко Лукич, Иқбол Маликжонов, Сардор Азимов, Сардор Етовқўзиев, Анвар Ҳожимирзаев, Муҳаммаданас Ҳасанов, Андрей Сидоров.
Захира: Музаффар Абдуллаев, Хуршид Хўжаев, Иван Йосович, Александр Мерзляков, Фарҳод Бекмуродов, Шоҳназар Норбеков, Мўмин Мелиев, Жамшид Раҳматуллаев, Бекзод Ҳошимов.