Ўзбекистон чемпионатининг финал учрашувлари 3-6 апрель кунлари ўтказилади

Мавсумнинг энг муҳим баҳслари ҳисобланган финал беллашувлари “Ўзбекистон” спорт мажмуасида ўтказилади.

Ҳабарингиз бор, чемпионлик учун баҳслар Тошкентнинг “Локомотив” ҳамда Қаршининг “Дўстлик-AIN” жамоалари ўртасида кечади. Айни дамда Ўзбекистон чемпионатининг амалдаги ғолиби ҳисобланган “темирйўлчилар”, чемпионлик унвонини ўзларида сақлаб қолиш ниятида бўлса, мусобақа дебютанти “Дўстлик-AIN” ўз тариҳида биринчи бор мамлакат чемпионатининг бош соврини учун курашади.

Айтиш жоиз, 2 босқичдан иборат бўлган Ўзбекистон чемпионатининг биринчи босқичини “Локомотив” жамоаси 1-ўринда якунлаган. Ўз навбатида “Дўстлик-AIN” плей-офф босқичига 6-ўринни қўлга киритиб йўл олган. Аммо “Локомотив”нинг мавсумдаги илк мағлубияти айнан “Дўстлик-AIN”га қарши кечган учрашувда қайд этилган. 11-тур доирасида кечган баҳс “Дўстлик-AIN” жамоасининг 4:2 ҳисобидаги ғалабаси билан якун топган.

Мавсумнинг бронза медали соҳиби 4-6 апрель кунлари аниқланади. Чемпионатнинг 3-ўрини учун беллашувда пойтахтнинг “Бунёдкор” ҳамда Андижоннинг “Турон-С” жамоалари тўқнашади. Таъкидлаб ўтиш лозим, ўзаро учрашувларда 2та ғалабани қўлга киритган жамоа 3-ўрин эгасига айнланади.

Ўз навбатида, финалчилардан бири 3та ғалабага эришгач, мамлакат чемпиони унвонини қўлга киритади.

ЎЗБЕКИСТОН ЧЕМПИОНАТИ
 ФИНАЛ
 3 апрель, пайшанба
18:00. Локомотив – Дўстлик-AIN

4 апрель, жума
 18:00. Дўстлик-AIN– Локомотив

5 апрель, шанба
 18:00. Локомотив – Дўстлик-AIN

6 апрель, якшанба
Қўшимча учрашув
 18:00. Дўстлик-AIN – Локомотив

3-ўрин учун ўйин
 4 апрель, жума
 15:00. Бунёдкор – Турон-С

5 апрель, шанба
 15:00 Турон-С – Бунёдкор

6 апрель, якшанба
 Қўшимча учрашув
 15:00. Бунёдкор – Турон-С