Ойбек Қосимов: "Инчеондан медаллар шодаси билан қайтамиз"

Кўп йиллар давомида "Пахтакор" ПФК ва Тошкент шаҳар футбол федерациясининг вице-президенти лавозимида фаолият олиб бориб, бугунда миллий олимпия қўмитасининг бош котиби лавозимигача кўтарилган Ойбек Омилович шундай дейди:

- Сўнгги йилларда Ўзбекистон спорти эришаётган ютуқларга кўпчилик ҳавас билан қараяпти. Албатта, бунинг замирида Юртбошимизнинг спортга бўлган катта эътибори ётади. Қолаверса, Мираброр Усмоновнинг қўл остида футболимиз кенг суръатда тараққий этиб боряпти. Эндиги мақсадимиз Миллий Олимпия Қўмитасини ҳам профессионал даражага олиб чиқиш. 2014 йилда бизни ажойиб мусобақа кутиб турибди. Жанубий Кореянинг Инчеон шаҳрида навбатдаги Осиё ўйинлари бўлиб ўтади. Хабарингиз бор, бундан 20 йил аввал Рустам Акрамов ва Биродар Абдураимов бошчилигидаги Ўзбекистон терма жамоаси қитъамизнинг энг кучли терма жамоаси номини қўлга киритганди. Бу сафарги мусобақадан ҳам умидимиз катта. Энг олий мақсад эса Риода бўлиб ўтадиган ёзги Олимпиада ўйинларида кўпроқ медалларни қўлга киритиш. Янги йил барчангизга сиҳат-саломатлик, оилавий тотувлик келтирсин. Мустақил Ватанимиз янада гуллаб яшнасин".