– Бугунги ўйин ҳақидаги фикрларингиз билан ўртоқлашсангиз.
– "Қўқон-1912" жамоасини бугунги ғалаба билан табриклаймиз. Ўйинга келадиган бўлсак, ўзингиз гувоҳ бўлдингиз, бугун таркибда ротацияни амалга оширдик ва шу пайтгача майдонга тушмаган футболчиларни ўйнатдик. Улар анча вақтдан бери ўйин амалиётисиз қолишган эди. Ўйинни кузатган бўлсангиз, "Қўқон-1912" – Суперлига жамоаси ҳисобланади ва таркибида кучли футболчилар жамланган. Бироқ ўзингиз кўрганингиздек, ўйин тугашига беш дақиқа қолганида тўп ўтказиб юбордик.
– Биламизки, "Қўқон-1912" бу ерга биринчи рақамли жамоа сифатида ташриф буюрди. Улар Суперлига вакили бўлганлиги сабабли, жамоа даражаси барибир юқорироқ ҳисобланади. Биз уларга етарлича қаршилик кўрсата олдик, деб ўйлаймиз. Агар майдонга асосий таркиб туширилиб, кубок баҳсига янада жиддийроқ ёндашганимизда, очко олишимиз мумкин эдими?
– Биз кубок ўйинига жиддий муносабатда бўлдик. Нега деганда, захирада ўтирган футболчиларга имконият беришимиз керак эди. Шунча вақтдан бери таъкидлаб келаётганимдек, бир неча ўйиндан бери 12–13 нафар футболчимизга жуда катта юклама тушмоқда. Ҳозирда кўплаб ўйинчиларимиз жароҳатдан фориғ бўлишди. Уларнинг ҳолатини кўздан кечириш, келажакда жамоага ёрдам бера оладими ёки йўқми, шуни билиш ва қолаверса, улар ўйин амалиёти орқали жисмоний ҳолатини тиклаб олишларини мақсад қилган эдик. Кубок баҳсига жиддий қарадик, аммо барибир ушбу ротацияни амалга оширишимиз шарт эди. Ўзингиз кўрдингиз, бундай таркиб ва тизимда улар биринчи марта ўйнашмоқда. Умуман олганда, жамоамиз менда яхши таассурот қолдирди.
– Ўзингиз ҳам бироз аввал айтиб ўтдингиз, майдонга тушмаган, ўйин амалиётига эга бўлмаган футболчиларни тушириб, ротация қилдик, дедингиз. Хўш, ушбу ўйин орқали, яъни ротация натижасида ўзингизга керак бўлган хулосани ололдингизми?
– Ҳа. Биринчи навбатда, биз захирада қолиб кетган ва жароҳатдан қайтган футболчиларнинг ҳолатини кўрмоқчи эдик ва бунга эришдик. Ким нимага қодирлигини билиш мақсадида уларни шу томонлама синовдан ўтказиб олдик. Бошқа томондан, юқорида айтиб ўтганимдек, бу улар учун муҳим ўйин амалиёти бўлди. Келажакда ушбу футболчилардан фойдаланадиган бўлсак, албатта, бугунги ўйиндан ўзимизга тегишли хулосаларни чиқарамиз.
– Бизнинг легионерларимизни рақиб легионерлари билан қиёслай оладиган даражада ўйин бўлдими?
– Бугун, масалан, Марк Краснов яхши ҳаракат қилди. Вепа ҳам ўз даражасида ўйнади, бироқ бироз ўтиб толиқиб қолди ва жароҳат олди. Лекин, фикримча, Марк Краснов бугун муносиб ўйин кўрсатди.
