"Нефтчи" — "чемпион"...

Чемпионат якунига оз қолди. Суперлиганинг 2-босқичини қайси жамоалар кўнгилдагидек ўтказаётганини билиш мақсадида сўнгги 5та тур (16-20) натижаларига диққат қиламиз. 

Жиззах осмонида "қора булутлар"

Кишининг эътиборини тортадиган биринчи жиҳат шуки, ОФК кубогини (биз учун) кутилмаганда тарк этган "Сўғдиёна"нинг ишлари ички чемпионатда ҳам юришмаяпти. Суперлигани юқори кайфиятда бошлаган Улуғбек Бақоев шогирдлари охирги 5 ўйинда атиги 2 очко жамғаришди. 

Сизни ҳайрон қолдириши мумкин, аммо бу лигадаги энг ёмон натижа ҳисобланади. Жиззахнинг "бўрилари" охирги 450 дақиқа мобайнида рақиб дарвозасини бор-йўғи 1 марта ишғол қилишди (Про лига йўлланмаси учун асосий даъвогар бўлиб турган, "Динамо" футболчилари ҳам бу орада 5 та гол уришган).

"Навбаҳор" етакчиликни бой берди

15-турдан кейин Самвел Бабаян шогирдлари мусобақада карвонбошилик қилаётган эди. Бироқ, кейинги даврда фақатгина "Қизилқум" мағлуб қилингани боис, "Пахтакор" ва "Насаф" Наманган клубидан ўзиб кетди. 

Охирги турларда "Қўқон-1912" ва "Пахтакор"нинг мағлубиятсиз сериясига якун ясаган Рўзиқул Бердиев шогирдлари айни пайтда олтин медаллар учун асосий даъвогар бўлиб туришибди.

Шунингдек, "аждарлар" ўйин сифати борасида ҳам яхшироқ кўринаётганини унутмаслик керак. Чемпионатнинг ортда қолган даврида барчадан кўпроқ (32) тўп киритган "Насаф" футболчилари гол ўтказмаслик борасида ҳам энг яхши натижани қайд этишяпти (10).

Левченкога тасанно!

Тожикистонлик мутахассис келганидан кейин "Нефтчи"да жуда катта прогресс кузатилди. Мўминжонов бошчилигида 1-даврани 13-ўрин билан якунлаган фарғоналикларни айнан Виталий Левченко қутқариб қолди, десак ҳам муболаға бўлмайди. Унинг жамоаси охирги 5 турда 13 очко тўплади. Бу Суперлигадаги энг яхши натижа бўлиб турибди... 

Қолган клубларнинг 16 — 20-турларда қайд этган статистикаси билан танишинг. Жадвалда "Нефтчи" чемпион...

Муаллифнинг телеграмдаги канали → ФР| футбол АНАЛИЗИ