"Насаф"да қишки "перезагрузка": Бердиев жамоаси янги мавсумга қай даражада тайёр?

Ушбу учрашув нафақат халқаро мусобақадаги навбатдаги беллашув, балки ўзбек клублари учун янги футбол мавсумининг рамзий старт нуқтаси ҳам ҳисобланади.

"Аждарлар" янги йилни деярли янгиланган таркиб ва табиий авлодлар алмашинуви жараёни билан бошламоқда. Қуйида жамоанинг тайёргарлиги, таркибдаги ўзгаришлар ва истиқболлари ҳақида таҳлилий мулоҳазаларни тақдим этамиз.

Тайёргарлик: Анталияда 2 хафта йиғин

"Насаф" янги мавсумга тайёргарликни анъанавий тарзда Туркиянинг Анталия шаҳрида ўтказди. Икки ҳафталик йиғин давомида жамоа 8 та назорат учрашувида иштирок этди. Бу ўйинлар натижалари бир қарашда барқарор эмасдек туюлиши мумкин, аммо Бердиев одатдагидек йиғинни натижадан кўра эксперимент ва турли таркибни тажриба сифатида ишлатгани кўриниб турибди.

Назорат учрашувлари натижалари:

"Насаф" — "Цвиккау" (Германия) 1:6

"Насаф" — "Раднички Ниш" (Сербия) 3:0

"Насаф" — "Раднички 1923" (Сербия) 2:3

"Насаф" — "Явор Иваньца" (Сербия) 0:1

"Насаф" — "Медзь Легница" (Польша) 1:1

"Насаф" — "Енисей" (Россия) 1:6

"Насаф" — "Иртиш" (Қозоғистон) 3:1

"Насаф" — "Арсенал Тула" (Россия) 1:0

Йирик ҳисобдаги икки мағлубиятда турли экспириментлар синаб кўрилди. Йиғин давомида ёш футболчиларга кенг имконият берилганини ҳам унутмаслик лозим. Бердиев шу тариқа янги мавсумга жамоасини тайёрлади.

Етакчилар кетиши: 

Қишки трансферлар ойнаси "Насаф" учун бироз оғриқли кечди. Жамоа бир қатор етакчи ва тажрибали футболчилар билан хайрлашди: Игорь Голбан, Драган Черан, Суҳроб Нуруллоев, Шерзод Насруллаев, Жавоҳир Сидиқов, Ойбек Бозоров, Шуҳрат Муҳаммадиев ва Олександр Воробей.

Айниқса Насруллаев ва Бозоров жамоанинг тактик ва психологик устуни ҳисобланарди. Уларнинг кетиши "Насаф" ўйинидаги балансга жиддий таъсир кўрсатиши ёки кўрсатмаслигини мавсумда билиб оламиз.

Уларнинг ўрнини қуйидаги футболчилар тўлдирди: Ойбек Рустамов, Бобир Абдихолиқо, Акром Комилов, Самандар Муродбоев

Абдихолиқовнинг жамоага қўшилиши айниқса муҳим трансферлардан бири ҳисобланади. Норчаев жароҳат олган вазиятда у ҳужум чизиғидаги муаммони камайтиради. Агар Ҳусайн тўлиқ сафга қайтса, "Насаф" ҳужуми анча кучли ва кескин кўринишга келади.

Дарвоза чизиғида Муродбоев Неъматовга рақобат туғдириши кутилмоқда. Бу рақобат жамоанинг барқарорлиги учун муҳим омил бўлиши мумкин, чунки Воробей ўтган йили бу вазифани уддалай олмади. Муродбоев ҳали Суперлигада ўйнамаган ва бу йил унинг учун муҳим мавсум ҳисобланади. Ўз вақтида Абдувоҳид ҳам бу босқичдан ўтган. Акром Комилов эса Насруллаевнинг ўрнини тўлдириш каби жуда масъулиятли вазифани зиммасига олади. Рустамов эса марказий чизиқда барқарорлик олиб кириши лозим. У Олмалиқда бир неча мавсум барқарор тўп тепди. Энди буни Қаршида давом эттириши талаб этилади.

Мақсадлар ўзгармоқдами?

"Насаф"да авлодлар алмашинуви жараёни бошланяпти. Бу табиий ва бўлиши шарт жараён. Бироқ бу сафар Бердиев учун вазифа анча мураккаб бўлади. Чунки аввалги йилларда жамоа натижаларни асосан тажрибали ва шаклланган футболчилар орқали қўлга киритган эди яъни тайёр футболчилар хизматидан фойдаланилган.

Бу мавсумда эса вазият бошқача. "Насаф"ни халқаро майдонда мусобақаси йўқ. Бор ресурс ички чемпионатга йўналтирилади. "Ал Шорта" ва "Шаржа"га қарши учрашувлар кўпроқ рамзий аҳамият касб этади. Айнан бор эътиборни ички турнирга қаратилиши енгиллик бериши мумкин. 

Шунингдек, клуб ҳаракатлари ва трансфер сиёсати шуни кўрсатмоқдаки, чемпионлик ҳозирча асосий мақсад эмас. Асосий вазифа – рақобатбардош жамоа қуриш ва келажак учун асос тайёрлаш.

Бу ҳолат 2017 йилдан кейинги даврни эслатади. Ўша йилни эсласангиз, жамоанинг кўплаб футболчилар мавсум якунида "Пахтакор"га кўчиб ўтган. 2018-2019 йил "аждарлар" совриндорлар сафига кира олмади ва 2020 йилдан бошлаб қайтишни амалга оширишди, чунки футболчилар пишиб етилаётган, ўзининг чўққисига чиқаётганди. Бу ўсиш якунда чемпионлик билан якунланганди. Ҳозирги "перезагрузка" ҳам узоқ муддатли муваффақиятга йўналтирилган бўлиши мумкин.

Ёшлар ўзингизни кўрсатинг

Янги мавсум "Насаф" академияси тарбияланувчилари учун катта имконият эшигини очмоқда.

Сардор Баҳромов ўтган мавсумнинг иккинчи даврасидан бошлаб ўзини асосий таркиб футболчиси сифатида кўрсата бошлади. Унинг барқарорлиги ва майдондаги ишончли ҳаракатлари мураббийлар ишончини қозонган.

Шунингдек: Дилшод Муртозаев, Давронбек Усмонов, Диёр Абдуназаров аста-секин асосий жамоа муҳитига кириб келмоқда. Агар улар имкониятдан тўғри фойдалана олса, "Насаф" яқин йилларда яна янги юлдузларни кашф этиши мумкин.

Бердиев олдида энг оғир савол турибди: у яна бир бор жамоани қайта қуриб, рақобатбардош даражага олиб чиқа оладими? Тарих шуни кўрсатадики, у бундай вазифаларни бажара олган. Аммо вақт ўзгарган, лигада рақобат кучайган, қолган клублар молиявий ва селекцион жиҳатдан анча фаоллашган.

Раҳбарият ва ҳомийллар қўллаб-қувватлови ҳам муҳим

"Насаф" ҳозирги пайтда натижадан кўра жараён босқичида турибди. Бердиев яна бир бор яхши жамоа қуриш вазифасига қўл урмоқда. Бу босқичда яна бир жиҳат раҳбарият ва ҳомийларнинг қўллаб-қувватлови ҳам муҳим ҳисобланади, чунки атрофда ёқимсиз миш-мишлар йўқ эмас. Ҳар ҳолда шамол бўлмаса дарахтнинг учи қимирламайди. Бир нарса аниқ: агар "Насаф" бу жараёндан тўғри ўта олса, кейинги бир неча йилда яна Ўзбекистон футболида ҳал қилувчи кучга айланиши мумкин.