"Наполи" бош мураббийи Антонио Конте мавсум тугаганидан кейин ўз лавозимини тарк этади.
Инсайдер Фабрицио Романонинг хабарига кўра, 56 ёшли италиялик мутахассис ушбу қарорга келган ва бу ҳақда клуб президенти Аурелио Де Лаурентисни бундан бир ой олдин огоҳлантирган.
Шартнома 2027 йилнинг ёзига қадар амал қилишига қарамай, Конте клубга товон пули тўламайди ва клуб ҳам унга ҳеч қандай компенсация бермайди. Антонио келгуси иш жойи бўйича ҳеч бир жамоа билан келишмасдан туриб "Наполи"ни тарк этмоқда.
Неаполликлар Серия Анинг сўнгги тури олдидан турнир жадвалида иккинчи ўринни эгаллаб туришибди ва аллақачон 2026/27 йилги мавсум учун Чемпионлар лигаси йўлланмасини нақд қилишган.
Конте 2024 йилдан бери "Наполи"да ишлаб келаётган эди ва клуб билан Италия чемпионати ҳамда Суперкубогида ғолиб чиқди.
Бундан олдинроқ, "Наполи" бош мураббийлигига асосий номзод Маурицио Сарри эканлиги ҳақида хабар берилган эди.
