"Мавсумдаги энг ёмон ўйинмиз бўлди. Икки бўлимда ҳам яхши ўйнамадик. Ғалабага лойиқ эмас эдик. Шундай бўлиб чиқди", - дея гап бошлади Камолиддин Тожиев.
- Захирадан майдонга тушган футболчилар бугун ўйинга катта таъсир ўтказа олмагандек туюлди. Улар ўйинни бузди демайман, аммо кучайтира олмагандек кўринди. Ушбу фикрга қўшиласизми?
- Бугун ҳеч ким ўз даражасидаги ўйинни намойиш эта олмади.
- Ҳамдамов ажойиб формада. Ҳозир уни марказий ҳужумчи сифатида ўйнатяпсиз. Турдимуродов ва Паржишек каби ҳужумчилар захирада қолиб, нега Ҳамдамов ҳужумда ўйнамоқда?
- Полшалик футболчининг спорт формаси яхши эмас. У майдонга тушса ҳам, жамоага етарлича ёрдам бера олмайди. Рустам бўлса эндигина жароҳатдан фориғ бўлди.
- "Пахтакор" 2:1 ҳисобида олдинга ўтиб олганидан сўнг катта куч билан олдинга ўта бошлади ва қарши ҳужумда гол ўтказиб юборди. Аксарият жамоалар эса ҳисобда олдинга чиқиб олганидан сўнг кўпроқ ҳимояланиб, тўпни назорат қилишга интилади. Нега жамоа ғалаба қозониб турганида ўйинни ҳисоб бўйича ўйнамасдан, яна ҳужумга бораверди?
- Буни таҳлил қилиб чиқамиз. Йигитларга 3-4 дақиқа қолганини айтгандик. Билмайман нега, яна бориб гол урмоқчи бўлдик. Кейин эса яна гол ўтказиб юбордик. Ғалабани ушлаб қолишимиз керак эди.
- "Бухоро" ва "Нефтчи" билан ўйинда жамоа ҳисобга олдинга чиқиб олганидан сўнг тўғри ҳимояланган эди. Рақиблар эса деярли ҳеч қандай вазиятга эга бўлмаганди. Бугун эса иккинчи бўлимнинг дастлабки 10 дақиқасида жамоа тўлиқ ҳужумга зўр берди. Шундан сўнг Рўзиқул Бердиев Зафармурод Абдираҳматовни Ҳожиакбар Алижоновга қарши "персонал" тарзда ўйната бошлади. Бугун "Пахтакор"га бироз "прагматизм" етишмагандек...
- Бугун ёмон ўйнадик. "Нефтчи" ва "Бухоро" ҳеч қандай вазият ярата олмаганди. Билмайман, бугун бизга нима бўлди? Ўзимизнинг ўйинимизни кўрсатмадик. Йигитларнинг ўйини чиқмади.
- Балки чарчоқ аломатлари бунга сабаб бўлгандир?
- Чарчоқ ҳам. 7-8 нафар футболчимиз ҳар ўйинда майдонда. Буларни таҳлил қилиб чиқамиз. Бугун кўп эпизодларда кеч қолдик.
- Бугунги майдон жуда намдек туюлди. Тўп билан муомала қилиш қийинроқ бўлгандек...
- Ҳар доим майдонга айнан бир миқдорда сув сепамиз.
