Исми жисмига мос бўлсин-да!

Янги регламент, янгича формат ва янги ном остида ўтадиган чемпионат амалда қандай бўлади?

Ишга ёндошув, ташкилий томондан эътибор яхши тарафга ўзгаргани ҳақиқат. Бу тарафлама ташкилот ростан ҳам ўсишга эришди. ПФЛ аввал эътибордан четда қолдирган ташкилий масалаларга янги раҳбарият эътиборли бўлмоқда.

Тез орада Суперлигада титул ҳомий пайдо бўлиши эълон қилинди. Демак, катта эҳтимол билан Суперлига номига мос равишда бўлади ва совриндор жамоалар муносиб тарзда тақдирланишади. Яъни, чемпион бўладиган жамоага кўшимча мотивация пайдо бўлиш эҳтимоли мавжуд.

Футболда ҳар бир кичик детал муҳим. Немислар айтганидек, эътибордан четда қолиши мумкин бўлган кичик деталлар катта ғалабаларга ёки аксинча, мағлубиятларга сабабчи бўлиши мумкин. Бу футболнинг ташқарисидаги бўлаётган ишлар. Ичидаги ишлар эса буткул жамоаларга боғлиқ. Суперлига қанчалик қизиқ ўтиши нафақат ташкилий ишларга, балки жамоалар кўрсатадиган ўйин ва уларни ўз олдига қўядиган мақсадига ҳам боғлиқ. Биз авваллари оқсаган жиҳатларни, муаммоларни белгилаб олдик ва буларни янги мавсум олдидан тузатиш пайидамиз.

ПФЛ ваъда қилаётган ТВ трансляциялар, реклама, анонслар, мухлислар талабидан келиб чиқиб яратилиши кутилаётган шароитлар ва ҳоказо. Бу ишлар албатта ишқибозлар, умуман футбол учун ҳозирги замонда муҳим омил. Лекин Суперлигада ҳақиқий супер матчлар бўлиши жамоалар намойиш этадиган футболга боғлиқ.

Шуни алоҳида қайд этиш керакки, "Машъал" бу Суперлига учун йўқотиш. "Газчилар"да исталган жамоага бош оғриқ тақдим этиш салоҳияти мавжуд эди. Афсуски "Машъал"ни ўрнини банд этган "Сўғдиёна" борасида бу фикрни илгари суришга ҳеч қандай асос йўқ. Камига ҳеч бир жамоада ўз ўрнини тополмаётган Александр Мочинов билан Суперлигада иштирок этиш, бу лигада жон сақлаб қолишга "сигнал"дан даракка ўхшайди. Ҳар ҳолда "Сўғдиёна" ҳозирча Суперлигада қолган жамоаларга "ем" бўлишга асосий номзодлардан биридек таассурот қолдирмоқда.

Аслида Про-лигага тушиб кетган ва якунда Суперлига чиптасини "ютиб" олган "Нефтчи" борасида ҳам илиқ фикрларни айтиш мушкул. Сабаби, "Нефтчи" мана неча йилдирки ҳали ўзига келгани йўқ. Ўтган йили Абрамов келиб ҳам жамоани ўнглай олмаган бир пайтда, орада бир парчаланган ва таркиби яна ўзгариб кетган "Нефтчи"ни қайта оёққа турғазиш Сергей Ковшовни қўлидан келишига ишониш жуда қийин. Чунки Ковшов ўзининг мураббийлик фаолияти давомида ҳар доим аутсайдер мақомидаги жамоаларда ишлаган ва камида "навбатчи" мураббийлар сирасига киради.

"Сўғдиёна" ва "Нефтчи" якунда Суперлигада ўйнайдиган бўлди. Лекин улар танлаган мураббийларнинг салоҳияти янгича кўринишдаги Суперлигага қанчалик мос тушади? Бу катта савол.

Чемпионлик учун кураш эса қизийдиганга ўхшайди. Кўпчилик янги мавсумда "Пахтакор" чемпионлик учун катта қадам ташлаб қўйганини такрорлашдан чарчамаганди. Лекин амалдаги чемпион "Локо" амалга оширган трансферлар шуни кўрсатдики, айни пайтда футболчиларнинг статуси ва сифатли трансферлар кетма-кетлиги Суперлигада чемпион жамоа ўзгариши учун "темирйўлчилар"нинг рақобатчилари анчагина тер тўкишларига тўғри келади. "Локо"нинг энг катта ютуғи бу жамоа ўзаги сақлаб қолинди ва бўш чизиқлар рақобати янада кучайтирилди. "Локо" янада рақобатдош жамоага айланди.

"Пахтакор" ҳақида гап кетганда шуни айтиш мумкинки, жамоада таркиб борасида жуда кенг танлов мавжуд. Фақатгина жамоага таклиф этилган легионерларнинг даражаси "Пахтакор" савиясига мос тушмаётгани муҳим баҳсларда яққол кўриниб қолди. Шунингдек, ўтган мавсумдаги "йил ўйини"да "Насаф"дан учралган йирик мағлубият ва жорий йининг энг муҳим тўқнашувида қабул қилиб олинган мағлубият Арвеладзенинг салоҳияти борасидаги йиғилиб қолган саволларни яна кун тартибига чиқарди.
Маҳаллий футболчиларни чертиб олаётган "Пахтакор" легионер танлашда қийналмоқда. Жамоага таклиф этилган португалиялик ҳужумчи Гонсалвеш ҳақида фикр билдиришга эса ҳозирча эрта.

Нима бўлган тақдирда ҳам таркиб эътибори билан "Пахтакор" "Локомотив"га жиддий чақирув ташлайди.

Молиявий тарафдан имкониятлари чегараланиб қолган "кучли тўртталик"даги "Бунёдкор" ҳамда "Насаф" Суперлигада чемпионлик учун чинакамига курашишига ишониш қийин. Яна бир муаммо, бу жамоаларнинг захираси жуда тор. Бу ҳам Қосимов ёки Бердиевга қўшимча муаммоларни тақдим этади. Улар асосий эътиборни академия тарбияланувчиларига қаратган ҳолда барибир максимал натижа қайд этиш учун курашишади. Бу пайтда мураббий фактори асосий ўринга чиқади. Қосимов ва Бердиев айнан қийин шароитда ишлаб "пишган" мутахассислар саналишади. Шу боисдан ҳам уларни тўлиқ ҳисобдан чиқаришга ҳали эрта.

Суперлигага ўзгача файз ва интрига қўшишга потенциал жиҳатдан "Қўқон-1912", "Бухоро" ва "Навбаҳор" жамоаларидан умид катта. Нўъмон Ҳасанов, Илҳом Мўминжонов ҳамда Улуғбек Бақоев ўтган йилги натижалари ҳамда ишлари билан уларда мураббийлик салоҳияти мавжудлигини амалда кўрсатишди.

Шунингдек, АГМК жамоасида ҳам мақсад янада жиддийлашган. "Металлург" эса тубдан янгиланди. Бекободликлар янгича кўринишдаги чемпионатда қандай статусга даъвогарлик қилишларини эса вақт кўрсатади. Кўпчилик "Металлург" ниҳоят янги анъаналарга эга клубга айланишини кутмоқда.

Навоийнинг "Қизилқум" жамоасида ҳам ўзгаришлар йўқ эмас. Бу жамоа таркиб эътибори билан исталган жамоага муаммо туғдиришга қодир аслида. Суперлигада тажриба ва ёшлик шижоатини бирлаштиришга ҳаракат қилмоқчи бўлаётган Ҳамид Актамовни янги мавсумда қайтадан кашф этамизми? Бу савол кўпчилик навоийлик ишқибозларни қизиқтираётганига шубҳа йўқ.

Суперлигада ким чемпион бўлиши ёки кимлар қолган олтиталикда бўлиши муҳим эмас. Асл мақсад ва ният ўйинлар савиясини ошириш. Ҳар бир ўйинда жамоалар очко учун курашишни бошлашсагина кўзланган мақсадга эришамиз. Янги Суперлигада футболимиздаги эски "ўйин"ларни бошламасак бўлгани. Ўшандагина ҳар бир турда мухлислар орзиқиб ва интиқиб кутган ўйинлар ўз-ўзидан кўпайиб бораверади.

Суперлига ҳали бошланмади, лекин шахсан мен ҳозирданоқ 2-турни бошқача интизорлик билан кутяпман. Ёки 8-9-10-11 турдаги "кучли тўртталик"даги ўзаро қарама-қаршиликлар кетма-кетлиги мухлисларимизни стадионларимизга "михлаб" қўйишига ишонгим келади.

Муҳими, Суперлигамизнинг исми жисмига мос бўлсин-да!