Ироқ термасининг Жаҳон чемпионатидаги ягона голи муаллифи COVID-19 туфайли оламдан кўз юмди
21 июн 2020 21:10
Янгиликлар

Ироқ термасининг Жаҳон чемпионатидаги ягона голи муаллифи COVID-19 туфайли оламдан кўз юмди

21 июнь куни ироқлик собиқ ҳужумчи Аҳмад Ради 56 ёшида коронавирус туфайли вафот этди.

Ради 13 июнь куни шифохонага ётқизилган эди, кейин эса унга жавоб берилган. Бироқ, соғлиғи оғирлашгани боис 18 июнь куни касалхонага қайтарилган.

Аҳмад Ироқ миллий жамоаси сафида 1982-1997 йиллар давомида ҳаракат қилган ва терма билан ЖЧ-1986 ҳамда Олимпиада-1988'да иштирок этган. Термада 73та ўйинда қатнашиб, 43та тўп киритишга муваффақ бўлган Аҳмад Ради Ироқнинг мундиалдаги ягона голи муаллифи ҳам ҳисобланади. Ушбу голини Бельгия дарвозасига урган.

Форвард 1988 йил Осиёнинг энг яхши футболчиси номига сазовор бўлганди. Шунингдек, Халқаро футбол тарихи ва статистикаси федерацияси (IFFHS) талқинига кўра, у сариқ қитъанинг ХХ асрдаги энг яхши футболчилари рўйхатида 9-ўринда кўрсатилган.