Ҳакамлар, суд ходимлари ва журналистлар тўп тепганда

Соғлом турмуш тарзини тарғиб қилиш мақсадида ўтказилган бу тадбирда тўрт жамоа ғолиблик учун кураш олиб борди. Спорт журналистлари жамоасининг асосини "Championat.asia" сайти ходимлари ташкил этишгани эътиборга молик.

Аввалига журналистлар жамоаси "Мудофаа вазирлиги Кубоги-2015" соҳиби бўлган Олий суд жамоасининг асосий таркибига имкониятни бой берди.

Иккинчи жуфтликда Равшан Эрматов сардорлигида олий лигамизда фаолият олиб бораётган ҳакамлар гуруҳи Олий суднинг иккинчи таркибига қарши баҳс олиб бориб ғалаба қозондилар.

Учинчи ўрин учун кечган ўйинда спорт журналистлари рақибларини енгишни уддалашди. 

Олий суд раиси ўринбосари Раҳимжон Обидов сардорлигида залга тушган Олий суд ходимлари ва олий лига ҳакамлари ўртасида кечган финалнинг асосий вақти жанговар дуранг билан якунланди. Хаттоки, пенальтилар сериясида ҳам кучлар тенг келди.

Бир неча соат мобайнида турли соҳа вакиллари спорт майдончасидаги баҳсдан кўз узишмади. Барча жамоалар вакиллари жуда яхши жисмоний тайёргарликка эга эканликларини таъкидлаш даркор. Соғлом турмуш тарзи тарафдорлари сафи мана шундай учрашувлар боис кенгайиб бориши шубҳасиз.

Дарвоқе, шу куни мажмуада болалар ўртасида ташкил этилган байрам иштирокчилари Равшан Эрматов билан биргаликда эсдалик учун суратга тушганликлари ҳам эътиборни тортди.

Дўстона турнир барчада катта таассурот қолдирди. Бундай учрашувларни анъанавий тарзда ўтказишга келишиб олинди.

Учрашувлардан лавҳалар акс этган сара суратларни томоша қилинг.

\