Футболчи майдонга тушмай ўз жамоаси дарвозасига пенальти олиб келди

Мезбонлар ҳисобни очишди, аммо биринчи бўлим охирида захирадаги футболчининг аҳмоқона хатоси туфайли гол ўтказиб юборишди.

Нима?

Ҳа, тўғри ўқидингиз - айнан захира футболчиси туфайли.

"Хольштайн"нинг 23 ёшли футболчиси Михаэль Эбервайн бошқа футболчилар билан ўз жамоаси дарвозаси ортида чигалёзди машқларни бажараётган эди. Бу вақтда "Бохум" форварди Сильвер Ганвула тўпни ўзига тўғирлаб, жарима майдончасига кирди ва зарба берди, аммо у кутилганидек бўлмади. Тўп майдонни тарк этаётган бир пайтда Эбервайн (захирадаги) уни чизиқ устида тўхтатиб қолди.

Учрашув бош ҳаками Тимо Герах нима бўлганини пайқамади, аммо иккинчи Бундеслигада VAR бор. Видеоассистентлар вазиятни қайта кўриб чиқишди ва Эбервайн қоида бузганини маълум қилишди. Герах видеони ўзи томоша қилди ва "Хольштайн" дарвозасига пенальти белгилади.

Ноаниқ зарба соҳиби Сильвер Ганвула пенальтидан гол уришга муваффақ бўлди.

"Қоида бўйича бу тўғрими?" деяпсизми? Албатта, ҳакам ҳақ эди. Қоидаларга кўра, агар "ўйин жамоанинг алмаштирилган, четлатилган ёки захирадиги футболчиси туфайли тўхтатилса баҳс жарима зарбаси ёки пенальти орқали давом эттирилади". Эбервайн тўпни ўз жарима майдончаси ичида тўхтатди, шу сабабли 11 метрлик жарима зарбаси қўйилди.

Мезбонларнинг бахтига жамоа баҳсни 2:1 ҳисобида якунлади. "Хольштайн"да дебют қилишга улгурмаган Эбервайн эса фаолиятини бошқа клубда давом эттириши мумкин.