Bugun Superliga yangi mavsumida ishtirok etadigan so'nggi jamoa nomi ma'lum bo'lishidan xabaringiz bor. "Olimpik" va "Metallurg" kim qolishi hamda kim Pro ligaga tushib kyetishini aniqlab olishadi.
"Championat.asia" olgan ma'lumotga ko'ra, "Olimpik" sardori Nodir Abdixoliqovga biryo'la 4 klub qiziqish bildirmoqda. Pro ligaga tushib ketgan "Lokomotiv" jamoasi "Olimpik" yetakchisini o'z safiga qo'shib olmoqchi. Samvel Babayan yarim himoyachini o'z jamoasida ko'rmoqchi, ammo "temiryo'lchilar"ning bir nechta raqobatchilari bor. Bular: "Dinamo", "Surxon" va "Navbahor". Vadim Abramovning shaxsan o'zi 23 yoshli futbolchini Samarqandda ko'rmoqchi. "Surxon" hamda "Navbahor" ham bu kurashda faol bo'lishi turgan gap.
Ma'lumot uchun, Nodir Abdixoliqov joriy mavsum "Olimpik" tarkibida Superliga va O'zbekiston kubogida 29ta o'yinda maydonga tushdi hamda 6 ta assist qayd etdi.
Eslatib o'tamiz, bugun 15:00da bo'lib o'tadigan pley-off bahsidan keyin "Olimpik"ning keyingi taqdiri ma'lum bo'ladi va futbolchi shunga qarab qaror qabul qiladi.
