Далер Шарипов: "Ўзбекистонлик олимпиячилар совринли ўрин учун кураша олишади"

- Далер, биринчи давра якунланди. Бекобод жамоаси ҳозирда турнир жадвалининг сўнгги ўрнида ва Кубок баҳсларини ҳам эрта тарк этди. Ғалабалар учун нима етишмаяпти?

- Тўғри, биринчи давра жамоамиз учун омадсиз ўтди, кўплаб ўйинларда ғалаба қозониш имкони бўлди, лекин омадсизлик сабаб ғалабани қўлдан бой бердик. Биз футболчилар хар бир ўйинда ғалаба учун майдонга чиқамиз. Кубокда ҳам кучлар тенг кечган учрашувда пенальтилар сериясида "Сурхон" клубига имкониятни бой бердик.

- Жамоа лидерларидан бири Забиҳилло Ўринбоевнинг узоқ вақтлик жароҳатдан қайтиб, иккинчи даврада майдонга тушиши жамоага қулайлик яратадими ? 

- Албатта, Забиҳилло Ўринбоев жамоамиз етакчиси. Иккинчи даврада унинг майдонга қайтиши ҳужум чизиғимизда рақобатни оширади. Насиб қилса, жамоани бугунги оғир вазиятдан олиб чиқиб кетамиз.

- Тенгдошларингиз, Ўзбекистон олимпия терма жамоаси вакилларининг Олимпиада ўйинларидаги имкониятларини қандай баҳолайсиз ?

- Ўзбекистон U-23 терма жамоаси кучли футболчилар ва яхши мураббийлар штабига эга. Нафақат мен, балки бутун марказий Осиё давлатлари Ўзбекистонга мухлислик қилади. Айтиб ўтганимдек, бу футболчилар Олимпиадада яхши иштирок этиб, совринли ўринларни қўлга киритишига, шунингдек, чемпион бўлишига ҳам ишонаман.

Фурқат Пўлатов суҳбатлашди