Азамат Абдураимов: "Бугун ҳамма яхши ўйин кўрсатди"

Учрашувдан кейин бош мураббий Азамат Абдураимовдан ўйин тўғрисида фикрларини сўрадик.

- “Хорзам” оддий рақиб эмасди ва улар ўтган турда Қўқонда ғалаба қозонишганди. Шунга қарамай, бугун биз ўзимизнинг комбинацион ўйинимизни намойиш этиб рақибдан устунлик қилдик. Биринчи бўлимда рақиблар дарвозасига иккита тўп киритиб ўйин тақдирини деярли ҳал этиб қўйгандик. Бундан ташқари гол уришимиз учун яна кўплаб имкониятларга эга бўлдик. Иккинчи таймда айрим ўйинчиларга дам бериб таркибда ўзгаришлар қилдик. Натижада йирик ғалабага эришдик. Иккита ўйинда 10та тўп киритиш ҳар қандай мураббийни хурсанд қилади. Бугун майдонга тушган ҳамма футболчилар яхши ўйин кўрсатишди. Ҳимоя чизиғимизни ишончли ўйини эвазига дарвозамиздан тўп ўтказганимиз йўқ. Ярим ҳимоя ва ҳужумчиларнинг фаолликлари туфайли рақиб дарвозасига учта тўп киритдик. Ўйлайманки, мухлисларимиз кўрсатаётган ўйинларимиздан хурсанд бўлишяпти. Сафардаги учрашувларда ҳам мана шундай руҳда ўйнашда давом этамиз.

Албатта, иккинчи босқичда кураш қизғин бўлиши кутилганди. Шундай ҳам бўлмоқда. “НБУ-Осиё” нима учундир ўз майдонидаги иккала ўйинни ҳам бой бергани ажаблантирди. “Истиқлол” эса иккинчи босқични яхши бошлади. Шунингдек, “Машъал” бу турда кутилмаганда мағлубиятга учради. Аммо кураш ҳали олдинда ва биз рақибларга эътибор қаратмасдан ўз ўйинимизни намойиш этишимиз керак.