Анвар Бердиев: "Истиқлол"нинг мақсади Суперлигага чиқиш!"

"Футбол мухлисларини Про лига мавсуми бошлангани билан табриклайман. Очилиш учрашувида "Шўртан" майдонида меҳмон бўлдик. Биринчи галда уларни ғалаба билан табриклайман. Энди ўйин ҳақида нима дея оламан? Биринчи бўлимда бизнинг боллар курашларда ютқазгандек кўринди. Ўйинни яна қайта кўриб чиқамиз, таҳлил қиламиз.

Жорий мавсумдаги мақсадимиз ҳар бир ўйинда ғалаба қозониш ва Суперлигага йўлланмани қўлга киритиш. Бунинг учун жамоамиз бошлиқларига раҳмат айтиб қоламан. Улар бизга барча шароитларни яратиб беришмоқда. Бу биринчи баҳс, ҳали ҳеч нарса йўқотилгани йўқ. Кейинги учрашувларга муносиб тайёргарлик кўриб мухлисларни ва жамоамиз раҳбарларини хурсанд қилишга ҳаракат қиламиз. Жамоада молиявий томондан ҳеч қандай муаммо йўқ. Ҳали ҳаммаси олдинда. Аслида режамиз иккинчи рақам остида ўйнаш эди. Лекин, тезкор гол режаларимизни бузиб юборди. Биринчи голни ўтказиб юборганимиздан кейин олдинга ўтишдан бошқа чорамиз қолмаганди. Аҳамият берган бўлсангиз иккинчи бўлимда гол уриш учун ҳужум чизиғи вакилларини алмаштирдик. Футболда ютиш учун гол уриш керак. Гол урмасангиз бирор нарсага эриша олмайсиз.

Бош мураббийни кайфияти йўқлиги боис матбуот анжуманига мен кирдим. Рақиб иккинчи голни урганидан кейин хотиржамликка берилди. Шундан фойдаланиб босимни кучайтирдик",- дейди Анвар Бердиев.