Jamoa kecha safarda "Navbahor" mehmoni bo'lib yana mag'lubiyatga uchradi. Yana deyishimizning boisi, "Buxoro" birinchi bosqichda ham Namangandan mag'lubiyat bilan qaytgandi. Jamoa kecha 0:1 hisobida yutqazib qo'ydi.
Kechagi mag'lubiyatdan so'ng "Buxoro"ning ketma-ket mag'lubiyatlari soni qatorasiga 6ta o'yinga etdi. Ha, shunday. "Buxoro" mana oltita o'yindirki faqat mag'lub bo'lmoqda.
Jamoa oxirgi marta 12 avgust kuni o'z maydonida "Metallurg" ustidan 2:1 hisobida zafar quchgandi. Shundan so'ng Ulug'bek Baqoev shogirdlari birinchi bosqichning oxirgi ikkita turida yutqazib qo'yishdi: safarda "Navbahor" va uyda "Lokomotiv" bilan kechgan bahslarda.
Keyin ikkinchi bosqich boshlandi va "Buxoro"ning g'alabasiz seriyasi davom etdi. "Bunyodkor"ga qarshi 0:3 hisobida yutqazib qo'ygan "Buxoro" keyingi turlarda "Paxtakor", "Lokomotiv" va "Navbahor"ga imkoniyatni boy berdi. Hozir "Buxoro"ning omadi shundaki, jamoa hamma o'yinlarni yutqazgan taqdirda ham 7-o'ringa tushib kyetmaydi. Yo'qsa jamoa ancha harakatga tushib qolgan bo'lardi.
