Виллаш-Боаш “Марсель”да бошқа ишламаслигини эълон қилди. Клуб у истамаган футболчини сотиб олган

Клуб ярим ҳимоячи Оливье Нтшамни трансфер қилган. Виллаш-Боаш эса мазкур футболчини жамоада кўришни хоҳламаганди.

“Бу менинг қарорим эмас эди. Айнан мен рад қилган футболчи олиб келинди. У билан шартнома имзоланганини эса уйғониб, клуб сайтига кирганимдан кейин билдим. Клуб стратегиясидан норозилигимни билдириб, истеъфога чиқдим. Директорлар кенгаши ҳали ҳам менга жавоб бермади. Менга пул керак эмас, шунчаки кетмоқчиман. Бу клуб 2-3 йилдан бери трансфер бозорида истаганича иш тутмоқда ва мен бунга қўшилолмайман.

Бу ҳафта охирида содир бўлган воқеаларга ҳеч қандай алоқаси йўқ. Бу спорт тарафи билан боғлиқ. Шунчаки, кетмоқчиман. Президент Жак-Анри Эйрони жуда ҳурмат қиламан, аммо ушбу ерда менинг профессионаллигимга путур етказилди”, дейди мутахассис.

Эслатиб ўтамиз, 30 январь куни “Марсель” мухлислари жамоа базасига бостириб кириб, клуб раҳбарининг истеъфосини сўрашганди. Шунингдек, ишқибозларга жамоанинг ҳозирги ҳолати ҳам маъқул келмаган. “Марсель” Лига 1 20 туридан кейин 32 очко тўплаган ҳолда 9-ўринда бормоқда.