Валентин Коваленко ОЧЛдаги «Ал-Ҳилол» – «Ал-Аҳли» ўйинини бошқаради

26 февраль, чоршанба куни ОЧЛ-2014 «D» гуруҳи 1-тури доирасида Саудия Арабистонининг «Ал-Ҳилол» ва БААнинг «Ал-Аҳли» жамоалари ўртасидаги учрашув бўлиб ўтади.

Учрашувни ўзбекистонлик ФИФА рефериси Валентин Коваленко бошқариб боради. Унга қанотларда баҳрайнлик Наваф Шаҳин Муса ва Муҳаммад Жаъфар Салмон ёрдам беради.

Иорданиялик Адҳам Муҳаммад тўртинчи ҳакам этиб тайинланган бўлса, ироқлик Казум Ауда ас-Саидий ҳакамлар ҳаракатини баҳолаб боради.

Бу Коваленко учун жорий ОЧЛ баҳсларида иккинчи ўйин бўлади. Бунгача у ўз бригадаси (ёрдамчи ҳакамлар – ўзбекистонлик Рафаэль Илёсов ва Маъмур Саидқосимов, тўртинчи ҳакам – ўзбекистонлик Ильгиз Танташев) билан бирга ОЧЛ-2014 3-саралаш босқичидаги «Бейжинг Гуоан» (Хитой) – «Чонбури» (Таиланд) учрашувида ишлаган эди.

ОФК тасдиқлаган режа бўйича, Валентин Коваленко ОЧЛ-2014да «Санфречче Хиросима» (Япония) – «Сеул» (Жанубий Корея; F гуруҳи, 3-тур), «Шандонг Луненг» (Хитой) – «Поханг Стилерз» (Жанубий Корея; Е гуруҳи, 4-тур), «Йокогама Маринос» (Япония) – «Чонбук Моторс» (Жанубий Корея; G гуруҳи, 5-тур) учрашувларида ҳакамлик қилиши кутилмоқда.