Умид Аҳмаджонов халқаро форум доирасида юртимизга ташриф буюрган Пан Ги Мун бошчилигидаги делегация вакиллари билан учрашди

Пан Ги Мун Қорақалпоғистон Республикасининг Нукус шаҳрида “Оролбўйи ҳудудларида экологик муҳитни яхшилаш масалалари ва бу жараёнда корейс диаспорасининг роли” мавзусида халқаро форумга Жанубий Корея делегацияси раҳбари сифатида ташриф буюрганини ҳам алоҳида таъкидлаб ўтиш керак.
 
Форум доирасида Қорақалпоғистон Республикасида бир қатор тадбирлар ўтказилди. Жумладан, Жанубий Кореянинг Сеул шаҳридаги “Chung-Ang university high school” футбол жамоаси “Турон” марказий ўйингоҳида Қорақалпоғистон Республикасининг 19 ёшгача бўлган футболчилардан иборат терма жамоаси билан ўртоқлик учрашувини ўтказди. Ўйин 0:0 ҳисобидаги дуранг билан якунланди.
 
28 ноябрь куни  “Chung-Ang university high school” жамоаси Тошкент шаҳридаги “Миллий” ўйингоҳида Ўзбекистон миллий терма жамоасининг 17 ёшгача бўлган ўсмирлар жамоаси билан куч синашди. Бу учрашувда вакилларимиз кичик ҳисобда ғалаба қозонишди.

Бугун 29 ноябрь куни Миллий олимпия қўмитаси президенти, ЎФА 1-вице-президенти Умид Аҳмаджонов халқаро форум доирасида Ўзбекистонга ташриф буюрган Пан Ги Мун бошчилигидаги делегация аъзолари билан учрашди. Учрашувда "Sports&Solution" компанияси президенти Вун Чан Ти ва унинг ўринбосари Даниел Ким иштирок этишди. Вун Чан Ти учрашув давомида Ўзбекистон билан спортни, жумладан, олимпия спорт турларини ривожлантириш бўйича ҳамкорлик қилишга тайёр эканликларини маълум қилди. Бу борада талаб этиладиган барча йўналиш бўйича ўз ёрдамини бериш ва шу орқали Ўзбекистонда спорт турлари ривожига ҳисса қўшишдан боши осмонга етишини маълум қилди. Умид Аҳмаджонов Жанубий Корея миллий олимпия қўмитаси ва футбол ассоциацияси билан ўзаро ҳамкорлик масалаларини янада кучайтириш биз учун ҳар томонлама манфаатли эканини айтиб ўтди.
 
Учрашув сўнггида Умид Аҳмаджонов Жанубий Корея делегацияси вакилларига Миллий олимпия қўмитаси ва Ўзбекистон футбол ассоциацияси номидан эсдалик совғаларини топширди.