Шавкат Саидов: "Эътиборсизлик оқибатда сўнгги сонияларда ғалабани бой бериб қўйганлигимиздан афсусдамиз"

"Навоийда ўтказиладиган учрашувларда ҳар қандай рақибга осон бўлмаслигини билардик ва шунга яраша тайёргарлик кўрдик. Кутилганидек, ўйин мезбонларнинг ҳужумлари билан бошланди. Биз худди шу ҳолатга тайёрлангандик. Рақибнинг дастлабки ҳамласини бартараф этганимиздан кейин илк қарши ҳужумдаёқ мезбонлар дарвозасини ишғол этдик. Ўйин қоидаси бузилгач Дилмурод Каримов тўпни чиройли тарзда жарима майдонига етказиб берди ва ҳаммадан баланд сакраган Жавоҳир Эсонқулов имкониятдан унумли фойдаланди. Биринчи бўлимнинг ўзидаек биз ғалабамизни мустаҳкамлаб олишимиз мумкин эди. ҳатто бир марта тўп ҳам киритдик. Бироқ ўйиндан ташқари ҳолат қайд этилди.

Иккинчи таймда ҳам гол ассистенти Дилмурод Каримов қулай вазиятда тўпни жамоадошларига аниқ етказиб бера олмади ва имконият кўкка совурилди. Бу бўлимда ҳам майдон эгалари табиийки босимни оширишди. Биз эса қарши ҳужум тактикасига таяндик. Тўлиқ ҳимояга ётиб олганимиз йўқ. Албатта, Навоийда дуранг натижа ҳам бизнинг жамоамиз учун муваффақият саналади. Бироқ биз оддий эътиборсизлик оқибатда сўнгги сонияларда ғалабани бой бериб қўйганлигимиз учун афсусдамиз. 

Энди чемпионатмизда кичик танаффус. Футболчиларни 1 июндан йиғамиз ва шуғулланишни давом эттирамиз. Кейинги учрашувимизгача таркибимиз иккига бўлинган ҳолда назорат учрашувини ўтказишини ҳам режалаштиряпмиз" - дейди Шавкат Саидов.