Роналду примеранинг энг яхши ўйинчиси, Симеоне энг яхши мураббий

“Реал” ҳужумчиси Криштиану Роналду Испания чемпионати-2013/14нинг энг яхши тўпурари бўлди.



Бундан ташқари, 29 яшар португалиялик иқтидор эгасининг “Валенсия” дарвозасига киритган голи мавсумнинг энг чиройли голи деб ҳам топилди. Бу ҳали ҳаммаси эмас. Криштиану Роналду ўтган мавсумнинг энг яхши футболчиси ҳам бўлди.

Мавсумнинг энг яхши мураббийи сифатида Мадриднинг “Атлетико” клуби бош мураббийи Диего Симеоне тан олинди. Аргентиналик мутахассис ўтган мавсум “Атлетико”ни Испания чемпионига айлантирганди.



Чемпионатнинг энг яхши африкалик футболчиси деб ўтган мавсум «Гранада»да ўйнаган ҳозир «Порту»да тўп тепаётган Ясин Браими, энг яхши жанубий америкалик деб «Севилья» ҳужумчиси Карлос Бакка топилди.



Ҳимояга ихтисослашган ярим ҳимоячилар орасида Лука Модрич («Реал») тенгсиз бўлди, Андрес Иньеста («Барселона») эса энг яхши ҳужумкор ярим ҳимоячи деб тан олинди.



2013/14 йилги мавсумнинг энг яхши дарвозабони деб айни пайтда «Реал»да, ўтган мавсум эса «Леванте» дарвозасини қўриқлаган Кейлор Навас деб топилди. Серхио Рамос ўтган мавсумнинг энг яхши ҳимоячиси бўлди.



«Реал Сосьедад» фэйр-плей совринига эга бўлди. Футболчилар орасида бу совринга «Барселона» ярим ҳимоячиси, ўтган мавсум «Севилья»да ўйнаган Иван Ракитич сазовор бўлди.



Рафаэль Алькантара («Сельта», «Барселона») «Мавсум кашфиёти» деб тан олинди.