Расмий хабар: "Обод" олий лигада қолди ва иккинчи даврада ўйнайди

Клуб раҳбариятида ишлаб келаётган кишилардан бирининг сайтимизга маълум қилишича, "Обод" янги ҳомийга эга бўлди. 

"Жамоага Украинадан ҳомийлар келди, бундан буён улар жамоани пул билан таъминлашади ва "Обод" иккинчи даврадаги иштирокини давом эттиради, - дейди клуб вакили. - Лекин мен ҳозирча янги ҳомийлар тўғрисида ва улар нима иш билшан шуғулланиши ҳақида ҳеч нарса дея олмайман. Фақат шуни айтишим мумкин, иккинчи даврада жамоани янги мураббий бошқаради ва у ҳам украиналик. Янги мураббий ҳозир футболчиларни иккинчи давра ўйинларига тайёрламоқда". 

"Обод"ни иккинчи даврада бошқарадиган янги мураббий бу - Андрей Анатольевич Демченко. Россия ва Украина фуқаролигига эга собиқ футболчи 1976 йил 20 августда туғилган. Футболчилик фаолияти давомида ЦСКА, "Аякс", "Металлург" (Запорожье), "Ильичёвец", "Оболонь", "Дачия", "Гелиос" каби клубларда тўп тепган. 

2011 йил мураббийлик соҳасида иш бошлаган Демченко дастлаб Запорожьенинг "Имекс" клубини бошқарган. 2012 йилда ўзи ўйнаган "Металлург"га мураббийлик қилган. 2013-2015 йилларда эса "Металлург"нинг ўринбосарлар жамоасини бошқарган. Аммо охирги икки йилда унинг қаерда ишлагани борасида маълумотга эга эмасмиз. 

Олий лига иккинчи давра тақвимига кўра "Обод" 16-тур учрашувини 5 август куни ўз майдонида "Навбаҳор"га қарши ўтказади. 

Х.Холиқов.