Ўзбекистон учун!

Сайтни нима десангиз, деяверинг! 

Айнан бизнинг сайтда 2015 йил КХДРга қарши учралган мағлубиятдан кейин, айб Қосимовда эмас, тизимда, олий лигада, кўплаб нуқталарда футболни йўқлигини айтилганида, 90% ўқувчи, ундан зиёд бўлмаса агар, сайтни "Қосимовчи"га чиқариб, сайт ходимларини унга қарши ҳеч нима ёзмаганликда айблаган эди. Эътиборни болалар футболига қаратишимиз кераклиги айтилганида, ЎФФнинг аксар ходимлари бизни майна қилишганди. Бугун Қосимовни истаб қолдик. Ўшанда бизда ҳамма нарса тўғри, айб мураббийда экан деб ҳеч ким кейинги йилларда бўладиган муаммони кўрмади. Хўш, айб Қосимовда эканми? 

Қорақалпоғистон, Сурхондарё, Хоразм, Гулистон каби ахоли гавжум жойларда футбол бўлмаган бир паллада, айбни Қосимовдан қидирган эдик. Уни кетишини истаб шеърлар ёзилди, "приколлар" қилинди. Ана кетди, Қосимов!

Ўшанда ҳам айтганмиз, пастдан бошлайлик ишни деб, ҳозир ҳам айтамиз пастдан бошлайлик деб. Ўшанда "ҳайкалтарош" ЎФФни ўсмирлар ва ёшлар ўртасидаги натижаларини пеш қилиб, тўғри йўлдан кетаётганлигини такидлаган эди, бугун эса шароит йўқлигидан нолияпти. Агар иш яхши бўлса, "зўр ишладик", иш ўхшамаса, "шароит йўқ". Бўлмаган гап! Пул билан иш битганида араблар аллақачон дунёни забт этган бўларди. Пулга тақалганда Бразилиядан биронта футболчи чиқмасди. 

Сайтдаги ўқувчилар диққатига. Узоқдан туриб олиб "провкация" қилаётганларга ишонманг. Эртага муаммо уларда эмас сизда бўлади, эртага ота-онангиз ортингиздан куйиб қолади. Уларнинг мақсади сизни, ўз ватанингизга қарши қайраш, ундан ўзгаси эмас. Уни спорт орқали қилишадими, санъат фарқи йўқ уларга. Уларнинг мақсади сизни чалғитиш. Бундай фисху фасодга учманг. Ютадими, ютқизадими тинчлик учун ҳаммамиз аҳил бўлишимиз керак! 

Бизнинг футболга мана шу аҳиллик етишмаяпти. Аҳил бўлишга интилаётганларнинг кўксидан итаришаяпти. Лекин бу ҳам бардавом бўлмайди. Ҳамма нарсанинг ҳам чегараси бўлади ва бир кун келиб ижобий томонга ўзгариш бўлади. 

Суриядан учралган мағлубиятда футболчиларни айблаб, уларни калака қилаётганлар, Сиз эмасмидингиз уларни бир неча йил аввал ўйинларидан роҳат олиб, футболга қизиққан. Гейнрихни ўша селфисини олайлик, миллионлаб мухлисларни қувонтирмаганмиди? Одилнинг Қатар дарвозасига урган голичи? Жепаровнинг сальтолари... Бошқа бундай футболчи чиқмаётганига, ҳамон улар терма жамоанинг юкини тортишга мажбур бўлаётганликлари учун нега уларни айблашимиз керак? Уларга ЖЧ керакмасми?

Мираброр Усмоновни ҳақорат қилишдан аввал ўйланг, айнан у кишини спортга қўшган хиссаси туфайли ота-оналарингиз Рио Олимпиадасида дуода бўлди. Эртага Қатарда, бизникиларга футболчиларнинг ғайрати ва халқнинг дуоси керак бўлди. Ҳозир керак бўлган икки нарса шу. Неча-неча киши жароҳати туфайли футболчилик фаолиятини, спортчилик фаолиятини тугатиб юборди. Мана яқин кунларда, Ўзбекистонда хорижлик мутахассислар билан ҳамкорликда, ўша Германияда қилинадиган опреацияларни амалга ошириш имкониятини берадиган катта касалхонанинг қурилиши бошланади. Шу ишларни тепасида турган кишиларни, билиб - билмай айблаш нотўғри. Аксинча шу ишларни кўрсатиб бера олмаётган, улар ажратаётган маблағларни тақсимлай олмай, ОАВ ва мухлисларни устидан кулаётганларга чиқиш эшикларини кўрсатиб, қайтиб футболга яқинлаштириш керак эмас!

Сиз ўйламанг, футболчилар барчасини қўл силтади, улар пулга тўйган деб. Шундай нарсалар бўлади-ки, пул иккинчи даражага тушади. Мен билган Аҳмедов ҳам, Ҳайдаров ва Гейнрихга ҳам пулнинг заррача қизиғи йўқ. Аксинча, олий лигадан уларга рақобатчини чиқмаётгани сабаб, рақобатсиз лигада футболчиларни миллионлаб топишаётганлиги бўлаяпти. Куни кеча Камолиддин Мурзоев МТЖга ҳаракат қилиб қўришини айтди, гаплашдик, кеч эмасми деб сўрадим... Очиқ мулоқот кетди, "дўстим, ёшлар-ёшлар деймиз-ку, ёшлар тўйиб бўлди пулга, шунга ҳам МТЖда рақобат йўқ", - дейди у. МТЖга олинмасамда ўз устимда ишлаб четга сўнгги уринишимни амалга ошириб кўраман деди. 

Олий лигага разм ташланг... Қани ўша истеъдодлар, ҳозирданоқ уларнинг тагида "Каптива", ризқини берсин. Яхшиликка ишлатсин. Лекин шу Гейнрих ўзининг биринчи машинасини Россияга боргач олган, Аҳмедовнинг биринчи "Нексия"си "Пахтакор"нинг хизмат машинаси бўлган, Сервер Жепаров Ўзбекистон чемпиони бўлганидан кейин "Тико" ҳайдаган. Азиз Ҳайдаров эса "Бунёдкор"га ўтгунига қадар жамоат транспортидан фойдаланган. Айнан улар қилган меҳнатни ҳозирги ёшлар қила олмаяпти. Ана шунинг учун олий лигани савияси тушиб кетди, ана шунинг учун МТЖда сиз-у, биз айтаётган қариялар кўпайиб кетди. Ҳеч бўлмаса 2 йил аввалги мақоламни устидан кулмасдан, кел бунда ҳам бир жон бордир дейилганида эса ҳозир биз Сурияга ютқазмаган бўлардик.

Мени бугунги мақолам мураббийга қаратилмайди. Мен Қосимов ишлаётганда ўз фикримни айтганман, маҳаллий мураббий билан муваффақиятга эришасиз, қачонки футбол тизими Корея ёки Япониядагидек бўлса, ундай бўлмаса хорижлик мураббий керак, бўлди!

Мен танқиддан қўрқмайман, сайтимни ҳам ёпишларидан чўчимайман. Бизни болалар футболида тутаётган ўрнимиз Ўзбекистонда ортиб бораяпти. Биз чинаккам футболга энди кириб келдик, бундан 10 йил аввал қилинган хатоларга биз жавоб бермаймиз, буни тўғри тушунинг. Бизнинг давр энди келаяпти. ЎФФ томондан ҳам бизнинг лойиҳаларимиз томон садо чиқа бошлади. Шуни ўзи қувонарли. Фақат бирлашиш қолди холос. Ҳамма ўзича "ақилли" бўлиб ишласа, эрта индин Непал ёки Бангладеш билан ҳам чўчиб ўйнайдиган бўлиб қоламиз. 

Сизлардан илтимос қилардик-ки, терма жамоани, ҳа айнан Ватанимиз жамоасини ёлғизлатиб қўйманг. Аммо кассаларда "олиб сотарлар"дан чиптани асло ола кўрманг, улар ҳам тизимни кемираётган "қурт"лардан бири ҳисобланадилар. Чипта қолмайди деб ўйламанг, чипта сероб. Фақат нима бўлганда ҳам футболчиларимизни ёлғизлатиб қўйманг, бугунги футбол савиясида уларни айблаш қийин. Шундоқ ҳам бу даражага улар енгил-елпи меҳнат билан чиқмаганлар. Буни оиласида спортчи бор киши билади. Илк дақиқаларданоқ Ўзбекистон деб ҳайқиринг-ки, стадион ларзага келсин, илк дақиқаданоқ футболчиларимиз шижоат кўрсатсилар. Агар эртага ҳам мағлубият бўлса, унга сабабчилар барчамизни тинч қўйсинлар, бўлди.

ЖЧга чиқиш учун бизнинг гуруҳда биринчи ёки иккинчи ўринни эгаллашимиз керак. Бугунги ҳолатда, бугунги футболимиз савияси билан тан олишимиз керак, биз бунга мос эмасмиз. Ҳозирча, борига кўникишимиз керак. Бундан 7-8 йил аввал чиқарилмаган хулосаларни, чиқариш пайти келди. ЎФФ, Марказ ва ПФЛдагилар бизнинг таклифларимизга душман эмас, дўстлик кўзи билан қараса ўзгариш бўлади ва биз кейинги циклга сал бўлса ҳам тайёр бўламиз. Учинчи ўрин билан ЖЧга бориб бўлмаслигини барчангиз биласиз, жуда қийин иш.

Мақолага ҳамма "класс" боссин демаймиз, шунчаки ўзбеклигимизни намойиш этиб, қийин паллада ҳам ўзбек ўғлонларини қўллаб - қувватлашимизни кўрсатайлик, бу ҳам бир синов!

Раҳмат!

Нодирхўжа Юлдашев.