Осиё Кубоги-2019. Радулович бошчилигидаги Ливан иккита сариқ карточка туфайли гуруҳда қолиб кетди

Бу мусобақада илк бор 24та жамоа қатнашди ва олтита гуруҳда энг яхши натижага эришган 4та жамоа ҳам кейинги босқичга чиқди.

Кеча охирги бўлиб "E" гуруҳи баҳслари бўлиб ўтди. Ливан КХДР устидан 4:1 ҳисобида зафар қучди. Бироқ бу натижа ҳам ливанликларга етарли бўлмади.

Ваҳоланки уларнинг натижаси "D" гуруҳидаги Вьетнамнинг натижаси билан бир хил эди.

3-турдан сўнг Ливанда ҳам, Вьетнамда ҳам 3тадан очко ва тўплар нисбати 4:5 эди. Бундай ҳолатда жамоаларнинг олган карточкалари сони ҳисобланади ва ким камроқ огоҳлантирилган бўлса ўша жамоа тепада бўлади.

Ливан КХДР билан ўйингача 5та сариқ карточка олганди. Вьетнам ҳисобида ҳам 5та сариқ карточка бор эди. Бироқ кеча ливанликлар икки марта огоҳлантириш олишди ва айнан шу сабабли ҳам улар эмас Вьетнам кейинги босқичга йўл олди.

Агар сариқ карточкалар ҳам тенг бўлганида сўнгги йўл қоларди: қуръа.