Осиё Кубоги-2015. Хитой билан ўйинга тайёргарлик давом этмоқда

Бугун футболчиларимиз Брисбен шаҳридаги "Брисбен Страйкерс" (1-лига ҳаваскорлар жамоаси) уй учрашувларини ўтказадиган майдонда машғулот ўтказишди. Машғулот белгиланган вақтдан ярим соатча олдин бошланди. Биз Сиднейдан Брисбенга тушдан сўнг учдик ва бу ерга етиб келишимиз биланоқ нарсаларни дарҳол меҳмонхонага жойлаштириб, ўзимиз машғулотни кўргани кетдик. Хайрият, Сиднейдагидан фарқли ўлароқ бу ерда терма жамоа машғулот ўтказган майдон биз турган меҳмонхонадан кўп узоқ эмас экан.



Шаҳарда кун бўйи ёмғир ёққани туфайли майдон жиққа ҳўл ҳолатга келиб қолган экан. Машғулот одатдагидек енгил чигалёзди машқлари билан бошланди. Буни ёрдамчи мураббий Александр Волков ўтказди. Шундан сўнг навбат тўп билан ишлашга етиб келди ва бош мураббий Миржалол Қосимовга ёрдамчилари - Бахтиёр Ашурматов ва Шуҳрат Мақсудов ёрдам беришди. Дарвозабонларни эса ҳар доимгидек Пётр Гизимчук шуғуллантирди. Машғулотнинг асосий қисми таркибни иккига бўлиб олиб борилди. Бунда асосий таркиб билан Миржалол Қосимовнинг ўзи ишлади.



Сервер Жепаров, Тимур Кападзе, Баҳодир Насимов, Воҳид Шодиев, Одил Аҳмедов, Жасур Ҳасанов, Азиз Ҳайдаров, Сардор Рашидов, Жамшид Искандеров, Игорь Сергеев, Анзур Исмоилов каби футболчилар асосий таркиб аъзоси сифатида машғулот ўтказишди. Бошқа ўйинчилар билан Шуҳрат Мақсудов ишлади.



Дарвоқе, терма жамоамизнинг бугунги машғулотини кўриш учун хитойлик уч нафар журналист ҳам келди. Улар терма жамоамиз ҳақида маълумот олишга ҳаракат қилишди. Хитойлик бир ҳамкасбимизнинг айтишича, Осиё чемпионатини ёритиш учун Австралияга 150 нафарга яқин ОАВ ходимлари келган, шунингдек, Ўзбекистон - Хитой баҳсини 5 минг нафар хитойлик ишқибоз кузатиши кутилмоқда.


Хайрулла Холиқов
Брисбен