Олий лига. 25-тур рамзий терма жамоаси

Учта учрашув майдон эгаларининг ғалабаси билан якун топган бўлса, битта баҳсда меҳмонлар зафар қучишди, яъни “Бунёдкор” сафарда “Андижон”ни мағлуб этиб қайтди. Қолган учта ўйинда эса дуранг қайд этилди. Хусусан Самарқанд ва Навоийдаги беллашувларда ҳисоб очилмаган бўлса, Муборакда кечган воҳа дербисида 1:1 қайд этилди.  

Сайтимиз одатига кўра, 25-тур рамзий терма жамоасини келтириб ўтамиз. Мазкур тур рамзий термасидан “Машъал”, “Насаф”, “Металлург”, “Андижон”, “Динамо”, “Қизилқум”, “Бунёдкор”, “Локомотив”, “Бухоро”, “Пахтакор”, “Нефтчи” футболчилари ўрин олишди. Айрим сабабларга кўра, “Сўғдиёна”, “Навбаҳор” ва “Олмалиқ”дан ҳеч ким рамзий жамоага кира олмади.



ДАРВОЗАБОН
Санжар Қувватов (“Машъал”)

Воҳа дербисида муборакликлар посбони Санжар Қувватов анча яхши ҳаракат қилди. Гарчи у пенальтидан тўп ўтказиб юборган бўлса-да, бутун ўйин давомида ўз дарвозасини яхши қўриқлади. Шу боис Санжарни 25-тур рамзий терма жамоасига киритдик.

ҲИМОЯЧИЛАР
Одил Ҳамробеков (“Насаф”)
Ҳикмат Ҳошимов (“Металлург”)
Даврон Турсунов (“Андижон”)
Фирдавс Абдусалимов (“Динамо”)



Воҳа дербисида шунингдек “Насаф” футболчиси Одил Ҳамробеков ҳам ажралиб турди. Ёшлар терма жамоамиз аъзоси асосий таркибда майдонга тушиб, ўз маҳоратини намойиш эта олди. Қолаверса, у мураббийнинг ҳам ишончини оқлади. “Металлург” етакчиси Ҳикмат Ҳошимов эса “Қизилқум” билан кечган учрашувда ўзини кўрсатди. “Бунёдкор”га қарши андижонликлардан Даврон Турсунов ажралиб турган бўлса, “Динамо”нинг ўз майдонида бўлиб ўтган баҳсида Фирдавс Абдусалимов яхши ҳаракат қилди.  

ЯРИМ ҲИМОЯЧИЛАР
Самандар Шодмонов (“Қизилқум”)
Сардор Рашидов (“Бунёдкор”)
Иброҳим Раҳимов (“Локомотив”)
Жамолиддин Убайдуллаев (“Бухоро”)



Ярим ҳимоячилардан Самандар Шодмонов ҳам бу турда яхши ўйин намойиш этди. У бир неча бор рақиб дарвозаси олдида хавфли вазиятларни юзага келтирди. Секин-аста “Бунёдкор” етакчисига айланиб бораётган Сардор Рашидов навбатдаги турда гол уришга муваффақ бўлди. “Локомотив”нинг ўз майдонида бўлиб ўтган ўйинида Иброҳим Раҳимов яхши ҳаракат қилган бўлса, бухороликларнинг ёш футболчиси Жамолиддин Убайдуллаев ҳам ўзини кўрсата олди.

ҲУЖУМЧИЛАР
Игорь Сергеев (“Пахтакор”)
Шерзод Ҳакимов (“Нефтчи”)

Ҳужум чизиғига эса Игорь Сергеев билан Шерзод Ҳакимовни муносиб кўрдик. “Пахтакор” ҳужумчиси иккита гол уриб жамоасига навбатдаги ғалабани тортиқ этган бўлса, Шерзод Ҳакимов “Локо” дарвозасини ажойиб тарзда ишғол қилди.



БОШ МУРАББИЙ - Рустам  Мирсодиқов (“Металлург”)
Узоқ ўйланишлардан сўнг “Металлург” бош мураббийи Рустам Мирсодиқовни 25-тур рамзий терма жамоасига бош мураббий сифатида танладик. Агар адашмаётган бўлсак, бу Рустам Тўхтамуродовичнинг илк марта рамзий терма жамоага киритилиши бўлди. Тўғри, бунгача “Металлург” сингари бошқа клублар ҳам ғалаба қозонаётганди, бироқ “Металлург”нинг ғалабалари сенсация эмасди. Бу турда эса бекободликлар сафарда “Қизилқум” билан дуранг ўйнашди. Меҳмонларнинг ўйини чиройли чиққани боис Рустам Мирсодиқов вариантида тўхталдик.