Championat.asia'да янги рукн — "ОФ" анонси 

Ашкан Дежага Эрон Ислом Республикасининг пойтахти Теҳрон шаҳрида туғилган (5 июль, 1986 йил). Бўлажак футболчи 1 ёшга тўлганида унинг оиласи Берлинга кўчиб ўтади. 16 ёшида Германия фуқаролигини олган Ашкан мос равишда немисларнинг бош жамоасида ўйнаш ҳуқуқини ҳам қўлга киритди.

Бўйи — 181 см, оғирлиги — 74 кг. Эрон ва ГФР фуқаролигига эга. Позицияси бўйича вингер ҳисобланади. Айни пайтдаги трансфер қиймати 400 минг еврога тенг (Transfermarkt).

Клубдаги фаолияти

У футболдаги илк қадамларини "Райникендорф" клубида қўйди, кейин "Теннис-Боруссия" болалар жамоасида бир йил ўйнаб, 14 ёшида (2000 йил) Берлиннинг "Герта" клуби академиясига қабул қилинади. 4 йил давомида ёшлар жамоаси сафида ўйнаган Дежага 2004 йилдан бошлаб асосий жамоа билан шуғуллана бошлайди. Унинг Бундеслигадаги дебюти шу йилнинг ўзида "Бохум"га қарши ўйинга тўғри келди. Шу тариқа Ашкан 1892 йилда ташкил топган "Герта" клуби тарихида майдонга тушган энг ёш футболчига айланди. 2005-2006 йилги футбол мавсумида "Герта II" билан минтақавий футбол лигасида иштирок этган ярим ҳимоячи 12 та гол уриб, мусобақанинг энг яхши тўпурарига айланди. Мазкур натижа унинг кейинги фаолиятига ижобий таъсир кўрсатмай қолмади. Унинг ҳаракатлари бир қатор катта клубларнинг мутасаддилари эътиборини ўзига қаратганди.

Дежага 2007 йилда "Вольфсбург" сафига қўшилди. У ерда янги бош мураббий Феликс Магат 21 ёшли футболчини мунтазам равишда майдонга тушира бошлади. Ярим ҳимоячи ўзининг биринчи мавсумида 8 та гол уриб жамоа сафидаги энг яхши футболчилардан бири бўлди. "Бўрилар" Германия чемпионатида 5-поғонани эгаллашди, бу клуб тарихидаги энг яхши натижа эди. Кейинги йил Ашканнинг самарадорлиги кескин пасайди, аммо "Вольфсбург" Эдин Жеко, Графите ва Звездан Мисимовичларнинг саъй-ҳаракатари билан Бундеслига чемпионига айланди. Бу ғалаба ҳозирга қадар Дежага фаолиятидаги энг катта титул бўлиб қолмоқда. 

Ашкан Дежага "Вольфсбург"дан кейин "Фулхэм"да (2012/14) ўйнади. 2013/14 йилги мавсум якунида Лондон клуби Чемпионшипга равона бўлгач, футболчи Қатарга йўл олди (6,5 млн евро эвазига). "Ал-Араби" сафида 2016 йилга қадар тўп тепди ва маълум муддат "Вольфсбург"га қайтди. Кейин "Ноттингем Форест"даги муваффақиятсизлик. Ниҳоят, 2018 йилда эркин агент сифатида "Трактор Сози" клуби сафига қўшилди. Дежага бугунга қадар Табриз жамоаси шарафини ҳимоя қилиб келмоқда.

Терма жамоадаги фаолияти

Ашкан Дежага болалигида Эрон ўсмирлар терма жамоасидан бир неча бор чақирув олган, аммо бу таклифларга жиддий қарамаган. 2004 йилда эса Германия U16 жамоасидан келган таклифни узоқ ўйлаб ўтирмади. Шундан кейин футболчи немисларнинг 16, 17, 18, 19, 20, 21 ёшгача бўлган терма жамоаларида тўп тепди. Германия ўсмирлар терма жамоаси сафида 10-рақам айнан уники эди. 21 ёшида Германия учун майдонга тушган футболчи Эрон терма жамоасида ўйнаш ҳуқуқидан мосуво бўлганди. Бироқ, 2009 йил у учун омадли бўлди. Дастлаб, Бундеслига чемпиони бўлди. Июнь ойида Швецияда ўтказилган 23 ёшгача бўлган футболчилар орасидаги Европа чемпионатининг ғолибига айланди. Шу йилнинг июль ойида эса ФИФА қоидаларига ўзгартиришлар киритилиб, Ашкан яна Эрон таркибида ўйнаш ҳуқуқига эга бўлди.

Кейинги йиллар давомида Бундестимдан таклиф олмаган футболчи 2012 йилнинг 29 февралида Карлуш Кейруш бошчилигидаги Эрон терма жамоасида дебют қилди. Ўша куни форслар Қатарни қабул қилиб, дурангга имзо чекишган эди (2:2). Голларнинг ҳар иккисига "Вольфсбург" вингери муаллифлик қилди.

Маълумот учун, Ашкан Дежага бугунга қадар Эрон миллий жамоаси сафида 57 ўйинда майдонга тушди ва 11 та гол урди. Қуйида унинг фаолиятига бағишланган видеолавҳани томоша қилишингиз мумкин.