"Нега Ўзбекистонда ПФЛнинг навбатдаги мавсуми учун лицензиялаш ҳозир ўтказилмоқда? Лицензия олиб, чемпионатдан чиқиб кетаётган "Турон"дан сўранг" — Алишер Никимбаев

"Мана кўзбўямачиликнинг яна бир мисоли. ОЧЛда иштирок этиш учун лицензиялар сони бўйича мамлакатларни солиштириш.

Кўришидан, тасанно дегингиз келади. Бир вақтнинг ўзида шунчалик кўп профессионал клублар – Хитой, Корея ва Японияни қўшиб ҳисоблагандан ҳам кўпроқ.

Аммо шошманг, Японияда бир йил олдин 50 дан ортиқ лицензияланган клублар бор эди. Улар қаерга ғойиб бўлишди? Ҳеч қаерга йўқолишмади. Шунчаки Чемпионлар Лигаси мавсуми ўзгарди ва ҳозир Япония, Корея ва Хитойда миллий лигага лицензия бериш Чемпионлар Лигасидан фарқли вақтларда ўтказилмоқда. Шунинг учун Японияда атиги 4 та лицензия талабномаси бўлган ва уларни барча 4 клуб қабул қилган. Кореяда 5 та ариза бўлган, 4 таси лицензия олган.

 J-лига ва К-лига учун лицензиялаш жараёни кузда бўлиб ўтади. Ва бу мантиқий, чунки янги мавсум баҳорда бошланади. Айтганча, Ўзбекистонда бўлгани каби. Хўш, нега Ўзбекистонда ПФЛнинг навбатдаги мавсуми учун лицензиялаш ҳозир ўтказилмоқда? Лицензия олиб, чемпионатдан чиқиб кетаётган "Турон"дан сўранг. Лицензия ололмаган, қандайдир йўл билан мавсумнинг асосий қисмини якунлаши керак бўлган "Сурхон"дан сўранг", – деди Алишер Никимбаев ЎзПФЛнинг лицензия ҳақидаги хабарига жавобан.