Мухтор Қурбонов: "Ҳужумчиларимизга совуққонлик етишмаяпти"

— Бугунги ўйинда бизга омад кулиб боқмади, — дея сўз бошлади Мухтор Қурбонов. — Жамоамиз учрашувни ёмон бошламаганди. Ҳисобни очишга муваффақ бўлгандик. Аммо йигитлар бутун ўйин давомида бир маромда ҳаракат қила олмадилар.

Умуман олганда, учрашувда юзага келган вазиятлардан унумли фойдаланиш борасида жамоамиз аъзоларига совуққонлик етишмади. Бугун ҳам Суҳроб Бердиев, Лазиз Убайдуллаев, Игорь Таранлар бир қатор голли имкониятларни ҳавога совуришди. Афсуски, бу ҳолат янгилик эмас. Аввалги ўйинларда ҳам айнан ҳужум чизиғимизда муаммолар кўзга ташланганди. Бу борада "Қизилқум" ҳужумчиларига ҳавас қилса бўлади. Баҳриддин Ваҳобов бежизга тўпурарлар баҳсида етакчилик қилмаётганлигини намойиш этди. Ҳимоячиларимизнинг ишончсиз ва палапартиш хатти-ҳаракатлари якунда натижага салбий таъсир ўтказди ва навбатдаги мағлубиятни тан олдик.

Ҳаёт эса давом этади. Эндигина ўн биринчи тур ўйинлари ортда қолди. Бизнинг захирамизда эса "Бунёдкор" билан қолдирилган учрашув ҳам бор.  Мавсумнинг қолган учрашувларини муваффақиятли ўтказиш учун барча имкониятни ишга соламиз.  Бугунги  ўйинни ҳали таҳлил қиламиз ва зарур хулосалар чиқарамиз, деган умиддаман.