MLS. Руни жамоаси янчиб ташланган ҳафтада Златан клуби билан чорак финалга чиқди ёхуд 1/8 финал якуни

Амалдаги чемпион юришини давом эттирди

Ўтган мавсумда матонатли ўйинлари билан барчани ҳайрон-у лол қолдирган ва якунда шоҳсупага кўтарилган "Атланта" ўз уйида катта қийинчиликларни енгиб ўтиб, ҳал қилувчи босқич йўлланмасига эга бўлган "Нью-Инглэнд"ни меҳмон қилди. Шуни қайд этиб ўтиш жоизки, учрашув тенг курашлар остида ўтди ва унда мезбонлар Франко Эскобарнинг 70-дақиқада урган ягона голи эвазига ғалабани тантана қилишди.

Драматик учрашув

Мавсум бошидан, доимий равишда етакчилар қаторида бўлиб келган "Сиетл Саундерс" ўз майдонида асли ўртамиёна жамоа ҳисобланган ва кучлиларга етарлича бошоғриқ бўла оладиган иштирокчилардан бири "Даллас"ни қабул қилди. Ўйинга келадиган бўлсак, иккила томон ҳам бир-бирларига очиқ футболни таклиф қилишди ва муҳлисларга голлар шодасини тақдим этишди. Ундан ташқари баҳс "овертайм"ларгача чўзилганини ҳам таькидлаб ўтиш лозим. Мезбонлардан "олтин гол"га муаллифлик қилган ўйин қахрамонига айланган Жордан Моррис "хет-трик" қайд этган бўлса, яна бир голни Рауль Руидиас урди. Далласликлардан Реджи Кэннон, Мэтт Хеджес ва сўнгги дақиқаларда умид чироқларини ёққан Браян Акосталар биттадан тўп киритишди.

"Торонто"дан ажойиб ғалаба

Деярли бир-бирига ўхшаш клублар "Торонто" ва "Ди Си Юнайтед" плэй-оффнинг дастлабки раундидаёқ ўзаро тўқнаш келишди. Хакамни қўшимча бўлимларга мурожаат қилишга мажбур қилган учрашувда ҳар жабҳада рақибидан устун келган мезбон жамоа муваффақият қозонишди. Аввалига Марки Дельгадо ҳисобни очди. Бироқ, асосий вақтга қўшиб берилган сўнгги сонияларда Лукас Родригес жамоасига умид бағишлаган эди ва лекин, "овертайм"ларда Жонатан Осарионинг "дубль"и, Ричи Лариея ва Ник Делеонлар томонидан киритилган голлар бу умидларни пучга чиқарди. Уэйн Руни эса, ушбу ўйинда бирон каромат кўрсата олмади.

Ютада кутилган натижа қайд этилди

Бутун мавсум бўйи чемпионликни қўлга киритиш йўлида астойдил тер тўккан жамоалардан бири бўлган "Реал Солт-Лейк" ўз мухлислари қаршисида сафарда анча-мунча рақибга етарлича муаммо туғдира оладиган "Портленд Тимберс" билан баҳс олиб борди. Учрашувга тўхталадиган бўлсак, дастлабки бўлим ўртасида Дамир Крейлах мезбонларни ҳисобда олдинга олиб чиқди. Аммо, ўйиннинг иккинчи ярмига старт берилиши билан Дайрон Асприлья ўртадаги мувозанатни тиклади. Лекин, барибир сўнгги дақиқалар ўтиб бораётган бир пайтда Жефферсон Саварино гол урди ва жамоаси учун кейинги босқичга йўл очди.

Филадельфиядаги супер жанг

"Филадельфия"ни минтақа чемпионига айланган "Нью-Йорк Сити" чорак финалда кутиб турган бир паллада, жамоа ўз ишқибозлари кўз ўнгида азалий рақибининг ҳамшаҳари бўлган "Нью-Йорк Ред Буллз" билан ғалаба учун мардонавор курашди ва амалда бунга эришди. Ўйин қўшимча бўлимларгача давом этди. Голларга, мезбонлардан Алехандро Бедойя, Жек Эллиот, Фафа Пико ва ўша керакли вақтда керакли жойда пайдо бўлиб, катта саҳнага чиққан захирадан майдонга тушган Марко Фабианлар муаллифлик қилишди. Нью-йорклик "буқалар"дан эса, Жош Симс, Тим Паркер Том Барлоулар биттадан тўп киритишди. Ха, Филадельфия шаҳри жамоаси футболчилари учрашувда кучли иродага эга эканликларини исботлашди.

Азалий рақиблар беллашувида лос-анжелесликлар ғолиб

Нимчорак финал босқичини якунлаб берган учрашувда азалий рақиблар "Миннесота" ва "ЛА Гэлакси" ўзаро тўқнаш келишди ва унда таркибида Златан Ибрагимовичдек ўйинчига эга бўлган жамоанинг қўли баланд келди. Учрашувга келадиган бўлсак, барча голлар иккинчи бўлимда урилди. Себастьян Ллетджет ва Жонатан Дос Сантоснинг киритган тўпларига ўйин сўнггида Ян Грегуш биргина голи билан жавоб қайтарди. Шу тариқа, меҳмонлар чорак финал йўлланмасини нақд қилишди.

Хондамир Ҳакимов