Салоҳ "Ливерпул"ни тарк этса, қайси клубларга бориши мумкинлиги маълум бўлди

"Ливерпуль" вингери Муҳаммад Салоҳ ўз фаолиятини Саудия Арабистони ёки Шимолий Америкада давом эттириши эҳтимоли бор. Эслатиб ўтамиз, 33 ёшли мисрлик АПЛнинг "Лидс"га қарши ўйинини (3:3) тўлиқ захира ўриндиғида ўтказди. Аввалги икки ўйинни ҳам захирадан бошлаган эди. Ўйиндан сўнг Салоҳ клуб ва бош мураббий Арне Слотни танқид қилди: "Мен клуб учун шунча иш қилдим, улар эса мени автобус тагига ташлашмоқда. Африка кубоги олдидан хайрлашаман - ундан кейин нима бўлишини билмайман". Футболчи клубнинг Чемпионлар лигасидаги "Интер"га қарши ўйин таркибига киритилмади.

2023 йил ёзида "Ливерпуль" "Ал Иттиҳод"нинг 150 миллион фунтлик таклифини рад этган эди. Ўшандан бери Салоҳга нисбатан Яқин Шарқ клубларининг қизиқиши ортиб бормоқда. "Ал Ҳилол"да Муҳаммад билан шартнома тузиш учун етарли маблағ борлиги тахмин қилинмоқда.

The Athletic хабарига кўра, агар Салоҳ АҚШга кўчиб ўтишга қарор қилса, у "Сан-Диего"га ўтиши мумкин - бу Америка клуби миллиардер Муҳаммад Мансурга тегишли.

Кўпчилик Салоҳни Лионель Месси ўйнаётган "Интер Майами"га ўтиши мумкинлигини таъкидламоқда. Бироқ, МЛС чемпионларининг режалари билан таниш бўлган манба хабар беришича, клубда аллақачон Жорди Алба фаолиятини якунлаганидан кейин бўш қоладиган ўринни эгаллаши кутилаётган ўйинчи бор.

Салоҳнинг МЛСдаги яна бир варианти "Чикаго Файр" бўлиб, улар жаҳон миқёсидаги юлдузни жалб қилмоқчи. Клуб аввалроқ Неймар ва Кевин де Брюйнени таклиф қилган, аммо турли сабабларга кўра трансферлар амалга ошмай қолган эди. "Чикаго" эгаси Жо Мансуэто катта харажатларга тайёр.

Музокаралар жараёнидан хабардор манбанинг маълум қилишича, "Чикаго Файр" Салоҳни апрель ойида вингер "Ливерпуль" билан янги шартнома имзолашидан олдин ўз сафига қўшиб олишга уринган. "Чикаго" ҳозирги вазиятдан фойдаланиб, яна футболчини ўз жамоасига қўшиб олишга ҳаракат қилиши мумкин.